ចំនួនទឹកប្រាក់ត្រូវការដើម្បីជួយដល់សហគមន៍ដែលប្រឈមនឹងភាពអាសន្នពាក់ព័ន្ធនឹងការប្រែប្រួលអាកាសធាតុដ៏អាក្រក់បានកើនឡើងជាង៨០០%ក្នុងរយៈពេលពីរទសវត្សរ៍ចុងក្រោយ ខណៈវិបត្តិអាកាសធាតុកំពុងកើនឡើងយ៉ាងឆាប់រហ័ស។

របាយការណ៍ថ្មីដែលចេញផ្សាយកាលពីថ្ងៃអង្គារ៍ដោយអង្គការ Oxfam បានរកឃើញថា មិនត្រឹមតែតម្រូវការសម្រាប់មូលនិធិជំនួយមនុស្សធ៌របស់អង្គការសហប្រជាជាតិពាក់ព័ន្ធនឹងអាកាសធាតុអាក្រក់ដែលឥឡូវនេះខ្ពស់ជាងកាលពី២០ឆ្នាំមុននោះទេ ប៉ុន្តែប្រទេសជាម្ចាស់ជំនួយក៏មិនបាន​ផ្តល់​នូវ​ចំនួនថវិកា​តាម​ការ​អំពាវ​នាវ​ថែម​​ទៀត។

របាយការណ៍បង្ហាញថា ក្នុងឆ្នាំ២០២១ ចំនួន​ទឹក​ប្រាក់នៃព្រឹត្តិការណ៍អាកាសធាតុគឺប្រហែលជា៣២៩ប៊ីលានដុល្លារ​អាមេរិក​ទូទាំងពិភពលោកដែលជាឆ្នាំខ្ពស់បំផុតទី៣នៅក្នុងកំណត់ត្រា និងស្ទើរតែពីរដងនៃជំនួយសរុបដែលត្រូវបានបរិច្ចាគដោយប្រទេសអ្នកមានទៅប្រទេសអ្នកក្រ។

ចន្លោះឆ្នាំ២០០០ និង២០០២ អង្គការសហប្រជាជាតិ (UN) ត្រូវការប្រាក់ជាមធ្យមតែ១.៦ប៊ីលានដុល្លារអាមេរិកប៉ុណ្ណោះក្នុងមួយៗឆ្នាំសម្រាប់គម្រោងមនុស្សធម៌ បន្ទាប់ពីព្រឹត្តិការណ៍អាកាសធាតុ។ ចាប់ពីឆ្នាំ២០១៩ដល់២០២១ UN បានកំពុងស្វែងរកថវិកាជាមធ្យមដល់ទៅ១៥.៥ប៊ីលានដុល្លារអាមេរិកក្នុងមួយៗឆ្នាំ ដែលមានន័យថា កើនឡើងដល់ជា៨០០%ឯណោះ។

បន្ថែមលើនេះ របាយការណ៍បានបង្ហាញថា រាល់ប្រាក់២ដុល្លារដែលត្រូវការដើម្បីដោះស្រាយគ្រោះមហន្តរាយដែលបង្កឡើងដោយការប្រែប្រួលអាកាសធាតុ ប្រទេសម្ចាស់ជំនួយអាចផ្តល់ឲ្យបានត្រឹមតែពាក់កណ្តាល៕

ប្រែសម្រួល៖ វីរបុត្រ
ប្រភព៖ CNN