ជនដៃដល់យកកាំភ្លើងកែច្នៃសាហាវបំផុតបាញ់លោក Abe

ជនដៃដល់ក្នុងការបាញ់សម្លាប់អតីតនាយករដ្ឋមន្ត្រីជប៉ុនលោក Abe Shinzo បានរើសយកកាំភ្លើងដ៏សាហាវបំផុតក្នុងចំណោមកាំភ្លើងកែច្នៃជាច្រើនដើមផ្សេងទៀតដែលរូបគេបានផលិតឡើង ។

ប្រភពនៅក្នុងការស៊ើបអង្កេតបានប្រាប់ទូរទស្សន៍រដ្ឋ NHK ថា ជនដៃដល់ឈ្មោះ Yamagami Tetsuya បានផលិតកាំភ្លើងកែច្នៃជាច្រើនប្រភេទជាមួយបំពង់ដែករុំព័ទ្ធខាងក្រៅដោយស្គុត ហើយកាំភ្លើងទាំងអស់បានផលិតរួចរាល់ជាច្រើនខែមុន ។

ប៉ូលិសនិយាយថា នៅកន្លែងកើតហេតុ ពួកគេបានរកឃើញកាំភ្លើងកែច្នៃមួយដើមមានកាណុង ២ ប្រវែងប្រហែល ៤០ សង់ទីម៉ែត្រ និងទទឹង ២០ សង់ទីម៉ែត្រ ហើយ​ក៏​បាន​រឹបអូស​កាំភ្លើងកែច្នៃ​ស្រដៀង​គ្នា​មួយ​ចំនួនទៀត​ដែលមានកាណុងពី ២ ទៅ ៦ កាណុងពី​ផ្ទះ​របស់​ជនសង្ស័យ​រូបនេះផងដែរ ។

ប៉ូលិសបញ្ជាក់ថា មុនកើតហេតុជនដៃដល់បានបញ្ចូលគ្រាប់កាំភ្លើងក្នុងបំពង់ដែកដែលគាត់បានទិញនៅលើអនឡាញ ហើយក្រោយមកដើរចូលបាញ់លោក Abe តែម្ដង ។

គួរបញ្ជាក់ថា ជនដៃដល់វ័យ ៤១ ឆ្នាំដែលជាអ្នករស់នៅទីក្រុង Nara ត្រូវបានចាប់ខ្លួនភ្លាមៗ និងចោទប្រកាន់ពីបទប៉ុនប៉ងមនុស្សឃាត បន្ទាប់ពីបាញ់លោក Abe ពីខាងក្រោយ ខណៈពេលដែលគាត់កំពុងថ្លែងសុន្ទរកថានៅលើដងផ្លូវក្នុងទីក្រុង Nara កាលពីថ្ងៃសុក្រ ៕

ប្រែសម្រួលដោយ ៖ ជីវ័ន្ត

ប្រភព ៖ NHK