នាយករដ្ឋមន្រ្តី ស្រីលង្កា ព្រមចុះចេញពីតំណែង ខណៈសេដ្ឋកិច្ចកាន់តែ អាក្រក់ទៅៗ

នាយករដ្ឋមន្ត្រីស្រីលង្កាលោក Ranil Wickremesinghe បានយល់ព្រមលាលែងពីតំណែង បន្ទាប់ពីមេដឹកនាំគណបក្សនៅក្នុងសភាបានទាមទារឲ្យទាំងលោក និងប្រធានាធិបតីដែលមានជម្លោះចុះចេញពីតំណែងនៅថ្ងៃដែលក្រុមបាតុករបានសម្រុកចូលវិមាន និងការិយាល័យរបស់ប្រធានាធិបតី ។

អ្នកនាំពាក្យរបស់នាយករដ្ឋមន្ត្រីលោក Dinouk Colambage បាននិយាយថា លោក Wickremesinghe បានប្រាប់មេដឹកនាំគណបក្សថា លោកនឹងលាលែងពីតំណែង នៅពេលដែលភាគីទាំងអស់បានយល់ព្រមលើការបង្កើតរដ្ឋាភិបាលថ្មី ។

គួរបញ្ជាក់ថា ការសម្រេចចិត្តរបស់លោកនាយករដ្ឋមន្ត្រីបានកើតឡើង បន្ទាប់ពីការតវ៉ាដ៏ធំបំផុតដែលបានវាយលុកប្រទេសស្រីលង្កាកាលពីថ្ងៃសៅរ៍ ខណៈដែលមនុស្សរាប់ម៉ឺននាក់បានទម្លុះរនាំង និងចូលទៅកាន់វិមានរបស់លោកប្រធានាធិបតី Gotabaya Rajapaksa និងការិយាល័យនៅក្បែរនោះ ដើម្បីបញ្ចេញកំហឹងរបស់ពួកគេប្រឆាំងនឹងមេដឹកនាំដែលទទួលខុសត្រូវចំពោះវិបត្តិសេដ្ឋកិច្ចដ៏អាក្រក់បំផុតរបស់ប្រទេស ៕

ប្រែសម្រួលដោយ ៖ ជីវ័ន្ត

ប្រភព ៖ Khaleej Times

ចុចអាន ៖ ស្រីលង្កា សុំឲ្យលោក ពូទីន ជួយទិញប្រេងឥន្ធនៈ