រុស្ស៊ី បាញ់មីស៊ីលល្បឿនលឿនជាងសំឡេងសម្លាប់សកម្មប្រយុទ្ធ អ៊ុយក្រែន ជាង ៦០០ នាក់

ក្រសួងការពារជាតិរុស្ស៊ីបានប្រាប់អ្នកយកព័ត៌មានកាលពីថ្ងៃព្រហស្បតិ៍ថា ការវាយប្រហារដោយយោធារុស្ស៊ីនៅតំបន់ Odessa នៃប្រទេសអ៊ុយក្រែនកាលពីថ្ងៃទី ១៦ ខែកក្កដា បានសម្លាប់ពួកសកម្មប្រយុទ្ធជាង ៦០០ នាក់ រួមទាំងទាហានស៊ីឈ្នួលចំនួន ១២០ នាក់ផងដែរ ។

ក្រសួងបាននិយាយថា “យោងតាមទិន្នន័យដែលបានធ្វើបច្ចុប្បន្នភាពលើកចុងក្រោយនៃការវាយប្រហារកាលពីថ្ងៃទី ១៦ ខែកក្កដា ដោយអាវុធល្បឿនលឿនជាងសំឡេងរបស់កងកម្លាំងដែនអាកាសរុស្ស៊ីលើទីតាំងដាក់ពង្រាយអ្នកជាតិនិយមបណ្តោះអាសន្នក្នុងមជ្ឈមណ្ឌល ‘Empire’ នៅក្នុងភូមិ Konstantinovka តំបន់ Odessa បានសម្លាប់ពួកសកម្មប្រយុទ្ធជាង ៦០០ នាក់ ក្នុងនោះទាហានស៊ីឈ្នួលបរទេសរហូតដល់ ១២០ នាក់ក៏បានបាត់បង់ជីវិតផងដែរ” ។

ទន្ទឹមនោះ ការវាយប្រហារនេះកើតឡើង ស្របពេលដែលរដ្ឋមន្ត្រីការបរទេសរុស្ស៊ីលោក Sergei Lavrov បាននិយាយថា គោលដៅរបស់យោធារុស្ស៊ីនៅក្នុងប្រទេសអ៊ុយក្រែន មិនមែនផ្តោតសំខាន់តែនៅភាគខាងកើតប្រទេសនេះនោះទេ ។

នៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋរុស្ស៊ី លោកបានបង្កប់ន័យថា យុទ្ធសាស្ត្ររបស់ទីក្រុងមូស្គូបានផ្លាស់ប្តូរហើយ បន្ទាប់ពីបស្ចិមប្រទេសផ្គត់ផ្គង់អាវុធរយៈចម្ងាយឆ្ងាយដល់អ៊ុយក្រែន  ដូច្នេះរុស្ស៊ីមានតែត្រូវកម្ចាត់កងកម្លាំងអ៊ុយក្រែនបន្ថែមទៀតចេញពីខ្សែត្រៀមជួរមុខដើម្បីធានាសន្តិសុខផ្ទាល់ខ្លួន ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោកប្រធានាធិបតី វ៉្លាឌីមៀ ពូទីន ចាត់ទុកជា “ប្រតិបត្តិការយោធាពិសេស” បានអូសបន្លាយពេលជិត ៥ ខែហើយ ក្រោយផ្ទុះការវាយលុកកាលពីថ្ងៃទី ២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ុយក្រែន សុំម្ចាស់បំណុលពន្យារពេលសងលុយរយៈពេល ២៤ ខែ