លោក ស៊ី ជីនពីង រៀបចំខ្លួនចាកចេញពីប្រទេស ចិន

នៅប៉ុន្មានថ្ងៃខាងមុខនេះ លោក ស៊ី ជីនពីង នឹងចាកចេញពីប្រទេសចិន ជាលើកដំបូងក្នុងរយៈពេលជាងពីរឆ្នាំ សម្រាប់ដំណើរទៅកាន់តំបន់អាស៊ីកណ្តាល ដែលលោកនឹងជួបលោក វ្ល៉ាឌីមៀរ ពូទីន ពោលគឺមួយខែមុនពេលលោក ស៊ី ត្រៀមខ្លួនបំពេញតួនាទីជាមេដឹកនាំចិនដ៏មានឥទ្ធិពលបំផុត ចាប់តាំងពីលោក ម៉ៅ សេទុង។

នេះគឺជាដំណើរទស្សនកិច្ចលើកដំបូងរបស់លោក ស៊ី នៅបរទេស ចាប់តាំងពីការផ្ទុះឡើងនៃជំងឺរាតត្បាត កូវីដ១៩ ហើយដំណើរនេះនឹងបង្ហាញថាតើលោក ស៊ី មានទំនុកចិត្តប៉ុនណា អំពីការក្តោបក្តាប់អំណាចនៅក្នុងប្រទេសចិន និងគូសបញ្ជាក់ថាតើស្ថានភាពពិភពលោកកាន់តែមានគ្រោះថ្នាក់កម្រិតណា ខណៈមានការប្រឈមមុខដាក់គ្នារវាងរុស្ស៊ីជាមួយលោកខាងលិចជុំវិញបញ្ហាអ៊ុយក្រែន វិបត្តិតៃវ៉ាន់ និង​សេដ្ឋកិច្ច​ពិភពលោក​ដែល​កំពុង​ជាប់គាំង។

លោក ស៊ី គ្រោងនឹងបំពេញទស្សនកិច្ចផ្លូវរដ្ឋទៅកាន់ប្រទេសកាហ្សាក់ស្ថាន នៅថ្ងៃពុធទី១៤ខែកញ្ញា ហើយបន្ទាប់មកនឹងជួបជាមួយលោក ពូទីន នៅក្នុងកិច្ចប្រជុំកំពូលរបស់អង្គការកិច្ចសហប្រតិបត្តិការសៀងហៃ នៅទីក្រុង Samarkand ក្នុងប្រទេស អ៊ូសបេគីស្ថាន។

ធ្លាប់តែជាដៃគូជាន់ខ្ពស់នៅក្នុងឋានានុក្រមកុម្មុយនិស្តសកល ឥឡូវនេះ ប្រទេសរុស្ស៊ីបន្ទាប់ពីការដួលរលំនៃសហភាពសូវៀតឆ្នាំ ១៩៩១ ត្រូវបានគេចាត់ទុកថាជាដៃគូវ័យក្មេងរបស់ប្រទេសចិនកុម្មុយនិស្ត ដែលត្រូវបានគេព្យាករណ៍ថានឹងវ៉ាដាច់សហរដ្ឋអាមេរិក ក្នុងនាមជាមហាអំណាចសេដ្ឋកិច្ចធំបំផុតរបស់ពិភពលោកនៅទសវត្សរ៍ក្រោយ។

លោក ស៊ី បានជួបលោក ពូទីន ដោយផ្ទាល់ចំនួន ៣៨ លើកចាប់តាំងពីបានក្លាយជាប្រធានាធិបតីរបស់ប្រទេសចិនក្នុងឆ្នាំ ២០១៣ ប៉ុន្តែលោក ស៊ី មិនទាន់បានជួបលោក ចូ បៃដិន ដោយផ្ទាល់នៅឡើយទេចាប់តាំងពីលោក បៃដិន បានក្លាយជាប្រធានាធិបតីសហរដ្ឋអាមេរិកនៅឆ្នាំ ២០២១។

លោក ស៊ី បានជួបលោកពូទីនលើកចុងក្រោយកាលពីខែកុម្ភៈ ពោលគឺប៉ុន្មានសប្តាហ៍មុនពេលប្រធានាធិបតីរុស្ស៊ី ចេញបញ្ជាឲ្យបើកការលុកលុយប្រទេសអ៊ុយក្រែន ដែលបានធ្វើឲ្យមនុស្សរាប់ម៉ឺននាក់ស្លាប់និងបង្កចលាចលដល់សេដ្ឋកិច្ចពិភពលោក៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក ស៊ី និង ពូទីន នឹងជួបទល់មុខគ្នាផ្ទាល់ នៅសប្តាហ៍ក្រោយ