ចូ បៃដិន៖ ពូទីន បានរំលោភធម្មនុញ្ញ UN ដោយឥតអៀនខ្មាស ជាមួយនឹងការលុកលុយ អ៊ុយក្រែន (មានវីដេអូ)

ប្រធានាធិបតីអាមេរិកលោក ចូ​​ បៃដិន កាលពីថ្ងៃពុធទី២១ខែកញ្ញា បានចោទប្រកាន់រុស្ស៊ីថា បានរំលោភដោយឥតអៀនខ្មាសលើសណ្តាប់ធ្នាប់អន្តរជាតិ ដោយការលុកលុយអ៊ុយក្រែន។

លោក បៃដិន បានស្វែងរកការគាំទ្ររបស់ពិភពលោក នៅក្នុងសុន្ទរកថាទៅកាន់អង្គការសហប្រជាជាតិ ពោលគឺត្រឹមប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីរុស្ស៊ីលោក វ្ល៉ាឌីមៀរ ពូទីន ប្រកាសកែនទាហានបម្រុង ឲ្យទៅប្រយុទ្ធនៅអ៊ុយក្រែន។

លោក បៃដិន បាន​ប្រាប់​មហាសន្និបាត UN ​ថា “​រុស្ស៊ី​បាន​បំពាន​គោលការណ៍​ស្នូល​នៃ​ធម្មនុញ្ញ​អង្គការសហប្រជាជាតិ​ដោយ​ឥត​អៀនខ្មាស។ និយាយឲ្យច្បាស់ សមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ បានឈ្លានពានអ្នកជិតខាងរបស់ខ្លួន ដោយប៉ុនប៉ងលុបបំបាត់រដ្ឋអធិបតេយ្យចេញពីផែនទី”។

បន្ទាប់ពីបរិហាររុស្ស៊ី, លោក បៃដិន បានថ្លែងដោយផ្តោតការយកចិត្តទុកដាក់ទៅលើផលប្រយោជន៍នៃប្រទេសកំពុងអភិវឌ្ឍន៍ ខណៈប្រទេសទាំងនោះ កំពុងអាក់អន់ស្រពន់ចិត្ត ជុំវិញការចំណាយដ៏ធំរបស់លោកខាងលិច លើអាវុធសម្រាប់អ៊ុយក្រែន។

លោក បៃដិន បានប្រកាសផ្តល់មូលនិធិ ២.៩ពាន់លានដុល្លារបន្ថែមទៀត ក្នុងគោលបំណងដោះស្រាយបញ្ហាអសន្តិសុខស្បៀងជាសកល ដែលកាន់តែអាក្រក់ទៅៗចាប់តាំងពីការលុកលុយអ៊ុយក្រែន ដែលជាប្រទេសនាំចេញគ្រាប់ធញ្ញជាតិដ៏សំខាន់។

លោកក៏បានបង្ហាញការគាំទ្រដល់ការពង្រីកក្រុមប្រឹក្សាសន្តិសុខផងដែរ ដែលគំនិតនេះត្រូវបានគិតគូរអស់រយៈពេលជាច្រើនទសវត្សរ៍មកហើយ។

លោក បៃដិន និយាយថា សហរដ្ឋអាមេរិកនឹងគាំទ្រកៅអីអចិន្ត្រៃយ៍សម្រាប់ទ្វីបអាហ្រ្វិក និងអាមេរិកឡាទីន បន្ថែមពីលើការគាំទ្រពីមុនរបស់ខ្លួន ក្នុងការដាក់បញ្ចូលប្រទេសជប៉ុន និងឥណ្ឌា៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ វីដេអូស្តែងៗ រុស្ស៊ី បាញ់ស្រោចដូចគ្រាប់ភ្លៀង លើភូមិដែល អ៊ុយក្រែន ទើបរំដោះបាន