ព័ត៌មានអន្ដរជាតិ

លោក ពូទីន ផ្ដល់សញ្ជាតិ រុស្ស៊ី ឲ្យអតីតចារកម្មជនជាតិ អាមេរិក

បានផុស

២ ខែ មុន

នៅ

ថ្ងៃអង្គារ ២៧ កញ្ញា ២០២២

ដោយ

ទីភ្នាក់ងារព័ត៌មាន TASS របស់រុស្ស៊ីបានរាយការណ៍កាលពីថ្ងៃចន្ទថា លោកប្រធានាធិបតី វ្ល៉ាឌីមៀរ ពូទីន បានផ្តល់សញ្ជាតិរុស្សីដល់អ្នកទម្លាយព័ត៌មានរបស់ភ្នាក់ងារសន្តិសុខជាតិអាមេរិក (NSA) ឈ្មោះ Edward Snowden ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន បានចុះហត្ថលេខាលើក្រឹត្យផ្ដល់សញ្ជាតិរុស្ស៊ីឲ្យអតីតចារកម្មជនជាតិអាមេរិករូបនេះកាលពីថ្ងៃចន្ទ រួមជាមួយនឹងជនបរទេសចំនួន ៧២ នាក់ផ្សេងទៀតផងដែរ ។

ដោយឡែកអ្នកនាំពាក្យវិមានក្រឹមឡាំង លោក Dmitry Peskov បានប្រាប់ទីភ្នាក់ងារសារព័ត៌មានថា លោក Snowden បានទទួលសញ្ជាតិរុស្ស៊ីជាលទ្ធផលនៃសំណើផ្ទាល់ខ្លួនរបស់គាត់ ដែលបានធ្វើឡើងក្នុងឆ្នាំ ២០២០ ដើម្បីធ្វើឲ្យវាកាន់តែងាយស្រួលសម្រាប់ភរិយាអាមេរិករបស់គាត់ឈ្មោះ Lindsay Mills ក្នុងការធ្វើដំណើរទៅមក ។

លោក Snowden អាយុ ៣៩ ឆ្នាំបានរស់នៅនិរទេសខ្លួននៅក្នុងប្រទេសរុស្ស៊ី ចាប់តាំងពីការលាតត្រដាងព័ត៌មានចារកម្មដ៏ធំរបស់ទីភ្នាក់ងារសន្តិសុខជាតិ (NSA) ដែលធ្វើឲ្យប៉ះពាល់ដល់ជនជាតិអាមេរិករាប់លាននាក់ក្នុងឆ្នាំ ២០១៣ ។

ទោះជាយ៉ាងណា សហរដ្ឋអាមេរិកនៅតែចង់ឲ្យលោក Snowden ត្រឡប់មកប្រទេសកំណើតវិញដើម្បីប្រឈមមុខនឹងការចោទប្រកាន់ពីបទចារកម្មទាក់ទងនឹងការលេចធ្លាយឯកសារសម្ងាត់ដ៏ធំសម្បើមនេះ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ អ៊ុយក្រែន អួតថា មិនប្រកាសកែនទ័ពបន្ថែមដូច រុស្ស៊ី នោះទេ