ព័ត៌មានអន្ដរជាតិ

អ៊ុយក្រែន ឲ្យ អ៊ីរ៉ង់ បញ្ឈប់ការផ្គត់ផ្គង់អាវុធដល់ រុស្ស៊ី ជាពិសេសយន្តហោះដ្រូនអត្តឃាត

បានផុស

៤ years មុន

នៅ

ថ្ងៃអង្គារ ១៨ តុលា ២០២២

ដោយ

ក្រសួងការបរទេសអ៊ុយក្រែនបានជំរុញឲ្យអ៊ីរ៉ង់បញ្ឈប់ជាបន្ទាន់នូវការផ្គត់ផ្គង់អាវុធដល់រុស្ស៊ី ជាពិសេសយន្តហោះដ្រូនអត្តឃាត បន្ទាប់ពីមានបាតុកម្មប្រឆាំងនឹងប្រទេសអ៊ីរ៉ង់បានកើតឡើងក្នុងទីក្រុងកៀវ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសបាននិយាយកាលពីថ្ងៃចន្ទថា ក្នុងសប្តាហ៍ចុងក្រោយនេះ រុស្ស៊ីបានប្រើប្រាស់យន្តហោះដ្រូនរបស់អ៊ីរ៉ង់ជាង ១០០ គ្រឿង វាយប្រហារអគារលំនៅដ្ឋាន ស្ថានីយ៍ថាមពល និងកន្លែងផ្សេងទៀតនៅក្នុងទីក្រុងមួយចំនួន ។

សេចក្តីថ្លែងការណ៍និយាយថា ការវាយប្រហារនោះបានបណ្ដាលឲ្យមនុស្សស្លាប់ និងរងរបួសរាប់សិបនាក់ រួមទាំងកុមារផងដែរ ហើយមួយភាគបីនៃហេដ្ឋារចនាសម្ព័ន្ធថាមពលរបស់អ៊ុយក្រែនត្រូវបានប៉ះពាល់ និងបំផ្លិចបំផ្លាញ ។

សេចក្តីថ្លែងការណ៍និយាយថា “ការផ្តល់អាវុធដើម្បីធ្វើសង្គ្រាមលុកលុយនៅអ៊ុយក្រែន និងសម្លាប់ពលរដ្ឋអ៊ុយក្រែន ធ្វើឲ្យអ៊ីរ៉ង់ក្លាយជាអ្នកចូលរួមក្នុងឧក្រិដ្ឋកម្មសង្រ្គាម និងអំពើភេរវកម្មប្រឆាំងអ៊ុយក្រែន” ។

ទន្ទឹមនោះ រដ្ឋមន្ត្រីការបរទេសអ៊ុយក្រែន លោក Dmytro Kuleba ក៏បានអំពាវនាវដល់សមភាគីសហភាពអឺរ៉ុបរបស់លោក ឲ្យដាក់ទណ្ឌកម្មលើប្រទេសអ៊ីរ៉ង់ផងដែរ ចំពោះការជួយរុស្ស៊ីប្រព្រឹត្តអំពើភេរវកម្ម ។

គួរបញ្ជាក់ថា ពលរដ្ឋអ៊ុយក្រែនបានប្រមូលផ្តុំគ្នានៅខាងក្រៅស្ថានទូតអ៊ីរ៉ង់ក្នុងទីក្រុងកៀវកាលពីថ្ងៃចន្ទ ដោយអ្នកខ្លះបានលើកទង់ជាតិអ៊ុយក្រែន និងបដាដែលសរសេរថា “ឈប់សម្លាប់យើងទៅ” ខណៈអ្នកផ្សេងទៀតកាន់ទៀនដើម្បីកាន់ទុក្ខដល់ជនរងគ្រោះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កាសែត WSJ ៖ វិបត្តិនៅ អ៊ុយក្រែន ធ្វើឲ្យ អាមេរិក ទន់ដៃជើង បើតតាំងក្នុងសង្គ្រាមជាមួយ ចិន