ដឹងមូលហេតុដែលលោក ហ៊ូ ជីនតាវ ចេញពីសមាជបក្សកុម្មុយនិស្ត ចិន

យោងតាមប្រព័ន្ធផ្សព្វផ្សាយរដ្ឋបានឲ្យដឹងថា អតីតប្រធានាធិបតីចិនលោក ហ៊ូ ជីនតាវ គឺមិនស្រួលខ្លួន នៅពេលគាត់ត្រូវបានអមដំណើរចេញពីពិធីបិទសមាជនៃបក្សកុម្មុយនិស្តដែលកំពុងកាន់អំណាចកាលពីថ្ងៃសៅរ៍ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មានចិន Xinhua បាននិយាយនៅក្នុងបណ្ដាញ Twitter កាលពីល្ងាចថ្ងៃសៅរ៍ថា “លោក ហ៊ូ ជីនតាវ បានអញ្ជើញឲ្យចូលរួមក្នុងសម័យប្រជុំបិទនៃសមាជជាតិលើកទី ២០ របស់គណបក្ស ទោះបីជាគាត់ទើបតែជាសះស្បើយពីជំងឺនាពេលថ្មីៗនេះក៏ដោយ” ។

ដោយឡែក Twitter មួយទៀត​បាន​និយាយ​ថា​ “​នៅ​ពេល​លោក ហ៊ូ ជីនតាវ មាន​អារម្មណ៍​មិន​ស្រួល​ក្នុង​អំឡុង​ពេល​ប្រជុំនោះ បុគ្គលិក​របស់​លោកបាន​អម​គាត់​ទៅ​បន្ទប់​មួយ​នៅ​ក្បែរ​កន្លែង​ប្រជុំ​ដើម្បីឲ្យលោក​សម្រាក ខណៈរហូតមកដល់ពេល​នេះ លោក ហ៊ូ ជីនតាវ ​មាន​សុខភាព​ប្រសើរ​ជាង​មុនហើយ” ។

លោក ហ៊ូ ដែលមានវ័យ ៧៩ ឆ្នាំគឺជាអ្នកស្នងតំណែងមុនរបស់លោក ស៊ី ជីនពីង ហើយបានអង្គុយនៅខាងឆ្វេងដៃរបស់លោក ស៊ី ខណៈក្រោយមក លោក ហ៊ូ ត្រូវបាននាំចេញពីសាលប្រជុំនៅទីក្រុងប៉េកាំងដោយអង្គរក្ស ២ នាក់ ។

គួរបញ្ជាក់ថា ព្រឹត្តិការណ៍សមាជគណបក្សកុម្មុយនិស្តចិនដែលបានប្រារព្ធឡើងជារៀងរាល់ ៥ ឆ្នាំម្ដង គឺបានបិទបញ្ចប់វិញហើយកាលពីថ្ងៃសៅរ៍ ក្រោយប្រព្រឹត្តទៅអស់រយៈពេល ១ សប្ដាហ៍ ខណៈលោក ស៊ី ជីនពីង បានជាប់ឆ្នោតជាប្រធានគណបក្សកុម្មុយនិស្តចិនសម្រាប់អាណត្តិទី ៣ ក្នុងរយៈពេល ៥ ឆ្នាំទៀត ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ The Guardian

ចុចអាន ៖ ណែនាំឲ្យស្គាល់ បុរសមានឥទ្ធិពលទាំង៧រូប ដែលគ្រប់គ្រងប្រទេសចិន ៥ឆ្នាំខាងមុខ