ព្យុះត្រូពិក Nalgae សម្លាប់មនុស្ស ១៣នាក់ នៅហ្វីលីពីន

ការបាក់ដី និងទឹកជំនន់ បានសម្លាប់មនុស្សចំនួន១៣នាក់ ខណៈភ្លៀងធ្លាក់ខ្លាំងដោយសារឥទ្ធិពលព្យុះត្រូពិក Nalgae បានវាយប្រហារភាគខាងត្បូងប្រទេសហ្វីលីពីន។

ជំនន់ទឹកភ្លៀងពេញមួយយប់ បានវាយប្រហារសហគមន៍ជនបទជុំវិញទីក្រុង Cotabato ដែលមានប្រជាជនប្រមាណ ៣០០ ០០០ នាក់។

លោក Naguib Sinarimbo អ្នកនាំពាក្យនិងជាប្រធានភ្នាក់ងារការពារជនស៊ីវិលសម្រាប់រដ្ឋាភិបាលក្នុងតំបន់ បានប្រាប់ AFP ថា មនុស្ស៧នាក់បានបាត់ខ្លួន។ អ្នក​ស្លាប់១០នាក់​ ក្នុងចំណោមអ្នកស្លាប់ទាំងអស់ ​គឺស្ថិតនៅ​ទីប្រជុំជន Datu Blah Sinsuat លើ​កោះ Mindanao។

ក្រុម​អ្នក​ជួយ​សង្គ្រោះ​ បានរកឃើញ​សាកសព​មនុស្ស ៣​នាក់​ផ្សេង​ទៀត​នៅ​ក្នុងទី​ក្រុង Datu Odin Sinsuat។

ភ្លៀងធ្លាក់ខ្លាំង បានចាប់ផ្តើមតាំងពីល្ងាចថ្ងៃព្រហស្បតិ៍នៅក្នុងតំបន់ក្រីក្រ ដែលស្ថិតនៅក្រោមការគ្រប់គ្រងរបស់ក្រុមមូស្លីម បន្ទាប់ពីការបះបោរប្រដាប់អាវុធផ្តាច់ខ្លួនរយៈពេលជាច្រើនទសវត្សរ៍។

គួរបញ្ជាក់ថា ព្យុះត្រូពិក Nalgae បានឆ្ពោះដំណើរទៅភាគខាងជើងប្រទេសហ្វីលីពីន ជាកន្លែងដែលការិយាល័យការពារស៊ីវិល និយាយថា មនុស្សជិត ៥០០០ នាក់ត្រូវបានជម្លៀសចេញពីតំបន់ដែលងាយរងគ្រោះដោយទឹកជំនន់ និងការរអិលបាក់ដី។

ជាមធ្យម ព្យុះចំនួន២០ បានវាយប្រហារប្រទេសហ្វីលីពីនជារៀងរាល់ឆ្នាំ ដោយបានសម្លាប់មនុស្ស និងសត្វពាហនៈ ហើយបំផ្លាញកសិដ្ឋាន ផ្ទះសម្បែង ផ្លូវថ្នល់ និងស្ពាន ថ្វីបើភាគខាងត្បូងប្រទេសនេះ កម្រនឹងរងគ្រោះក៏ដោយ៕

ប្រែសម្រួល៖ Vann Vann

ប្រភព៖ CNA

ចុចអាន៖ ព្យុះ Lionrock កំពុងហោះសំដៅទៅ វៀតណាម