ខ្មាន់កាំភ្លើង ប្រាប់មូលហេតុដែលខ្លួនប៉ុនប៉ងធ្វើឃាត អតីតនាយករដ្ឋមន្ត្រីប៉ាគីស្ថាន (មានវីដេអូ)

អតីតនាយករដ្ឋមន្ត្រីប៉ាគីស្ថានលោក Imran Khan ត្រូវបានគេបាញ់ចំស្មងជើងខាងស្តាំ នៅម៉ោង ៤:២១ នាទីល្ងាចថ្ងៃព្រហស្បតិ៍ (ពេលវេលានៅប៉ាគីស្ថាន) ខណៈដែលក្បួនបាតុកម្មប្រឆាំងរដ្ឋាភិបាលរបស់គាត់ រងការវាយប្រហារ។ យ៉ាងណាក្តី គាត់មិនគ្រោះថ្នាក់ដល់ជីវិតទេ។

គ្រូពេទ្យនិយាយថា មនុស្សសរុប១៤ នាក់បានរងរបួសក្នុងហេតុការណ៍នេះ ប៉ុន្តែអ្នកគាំទ្រម្នាក់របស់លោក Khan បានស្លាប់បន្ទាប់ពីត្រូវរបួសគ្រាប់កាំភ្លើង។

លោក Khan ត្រូវបានគេបញ្ជូនទៅមន្ទីរពេទ្យក្នុងទីក្រុង Lahore បន្ទាប់ពីការវាយប្រហារ ដែលកើតឡើងនៅទីក្រុង Wazirabad ចម្ងាយជិត ២០០គីឡូម៉ែត្រ ពីរដ្ឋធានី អ៊ីស្លាម៉ាបាដ។

អស់រយៈពេលមួយសប្តាហ៍កន្លងមកនេះ លោក Khan បានដឹកនាំក្បួនតវ៉ាទៅកាន់ទីក្រុង អ៊ីស្លាម៉ាបាដ ដើម្បីទាមទារឲ្យមានការបោះឆ្នោតជាបន្ទាន់។

អត្តសញ្ញាណ​ខ្មាន់កាំភ្លើង​ដែល​​ប៉ូលិស​ចាប់​ខ្លួនបាន ​មិន​ត្រូវ​បាន​គេ​បញ្ជាក់​ឲ្យ​ច្បាស់​ឡើយ ហើយភ្លាមៗនេះ ក៏គ្មាន​ក្រុម​ណាចេញមុខ​អះអាង​ទទួល​ខុស​ត្រូវដែរ។

យោងតាមសម្តីខ្មាន់កាំភ្លើង, រូបគេ​ចង់​សម្លាប់លោក Khan ហើយ​​ធ្វើ​សកម្មភាព​តែ​ម្នាក់​ឯងប៉ុណ្ណោះ។ ខ្មាន់កាំភ្លើងនិយាយថា លោក Khan កំពុងពង្វក់ប្រជាជន នាំប្រជាជនទៅរកផ្លូវខុស ហើយរូបគេមិនអាចទ្រាំបាន។ នេះជាហេតុផលនៅពីក្រោយការវាយប្រហារ។

គួរបញ្ជាក់ថា រដ្ឋាភិបាលរបស់លោក Khan ត្រូវបានផ្តួលរំលំក្នុងខែមេសាឆ្នាំនេះ តាមរយៈការបោះឆ្នោតសម្តែងសេចក្តីមិនទុកចិត្តរបស់សភា។ ចាប់​តាំង​ពី​ពេល​នោះ​មក លោក Khan បាន​រៀបចំ​ការ​ប្រមូល​ផ្តុំ​នៅ​ទូទាំង​ប្រទេស ដោយ​ទាមទារ​ឲ្យ​មាន​ការ​បោះ​ឆ្នោត​មុន​ពេល​កំណត់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Aljazeera

ចុចអាន៖ ប៉ាគីស្ថាន អង្វរប្រជាជន ឲ្យបន្ថយផឹក តែ ដើម្បីជួយសេដ្ឋកិច្ច