រុស្ស៊ី៖ ណាតូ នឹងស្លាប់ បើមិនបានប្រយុទ្ធគ្នា

អនុរដ្ឋមន្ត្រីការបរទេសរុស្ស៊ី លោក Alexander Grushko បានអះអាងថា ការមានសត្រូវដើម្បីប្រយុទ្ធជាមួយ គឺជារឿងចាំបាច់សម្រាប់ការរស់រានរបស់អង្គការណាតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកត្រូវបានដកស្រង់សម្តីដោយទីភ្នាក់ងារសារព័ត៌មាន RIA Novosti នៅថ្ងៃចន្ទទី១៤ខែវិច្ឆិកានេះថា “ណាតូគឺជាប្រភេទអង្គការដែលមិនអាចរស់នៅ ដោយគ្មានសត្រូវបាននោះទេ។ ប្រសិនបើគ្មានសត្រូវទេនោះ អង្គការនេះនឹងស្លាប់ ជាក់ជាមិនខាន”។

អ្នកការទូតរូបនេះបន្ថែមថា “ការពង្រីករបស់ប្លុកនេះ ត្រូវបានជំរុញខ្លាំងណាស់ ដោយតម្រូវការក្នុងការប្រឆាំងប្រទេសនានា។ ​ពួកគេ​បាន​ប្រកាសថា ​អាស៊ីគឺ​ជា​តំបន់​នៃ​ផលប្រយោជន៍​របស់​សម្ព័ន្ធមិត្ត​ ហើយ​បាន​រុញ​តំបន់សិទ្ធិ​ការពាររបស់​ពួកគេ ​ទៅ​ព្រំដែន​ប្រទេស​ចិន​”។

លោក Grushko បន្តថា ជម្លោះនៅអ៊ុយក្រែន កើតចេញពីចេតនារបស់អង្គការណាតូ ក្នុងការទទួលយកទីក្រុងកៀវជាសមាជិកថ្មី ទាំងដែលមិនអើពើនឹងកង្វល់សន្តិសុខជាតិរបស់រុស្ស៊ី។

សម្ព័ន្ធភាពយោធាដែលដឹកនាំដោយសហរដ្ឋអាមេរិកមួយនេះ បានប្រកាសថា ការដាក់បញ្ចូលអ៊ុយក្រែនគឺជាគោលបំណងមួយរបស់ខ្លួនក្នុងឆ្នាំ២០០៨ ផ្គើនទៅនឹងការព្រមានរបស់ទីក្រុងមូស្គូដែលថា ទង្វើបែបនេះនឹងឆ្លងកាត់បន្ទាត់ក្រហម។

បន្ទាប់ពីរដ្ឋប្រហារឆ្នាំ២០១៤ក្នុងទីក្រុងកៀវ រដ្ឋាភិបាលអ៊ុយក្រែនថ្មីបានទម្លាក់គោលនយោបាយអព្យាក្រឹតភាពរបស់ប្រទេស ហើយនិយាយថា ការចូលរួមក្នុងអង្គការណាតូ គឺជាគោលដៅចម្បងរបស់ខ្លួន៕

ប្រែសម្រួល៖ Vann Vann

ប្រភព៖ RT

ចុចអាន៖ អតីតមេបញ្ជាការរង អង្គការណាតូ អំពាវនាវឲ្យមានសង្រ្គាមត្រជាក់លើកទី២