លោក បៃដិន ចាំតែអង្គុយចរចាជាមួយ ពូទីន ប៉ុណ្ណោះ បើ រុស្ស៊ី ចង់បញ្ចប់​សង្គ្រាមនៅ អ៊ុយក្រែន

ប្រធានាធិបតីសហរដ្ឋអាមេរិកលោក ចូ បៃដិន លើកឡើងថា លោកត្រៀមខ្លួនរួចជាស្រេចក្នុងការអង្គុយនិយាយជាមួយប្រធានាធិបតីរុស្ស៊ី លោក វ្ល៉ាឌីមៀរ ពូទីន ប្រសិនបើរុស្ស៊ីកំពុងស្វែងរកមធ្យោបាយដើម្បីបញ្ចប់សង្រ្គាមនៅអ៊ុយក្រែន ។

លោក បៃដិន បានធ្វើការអត្ថាធិប្បាយបែបនេះ នៅក្នុងសន្និសីទសារព័ត៌មានរួមគ្នាជាមួយប្រធានាធិបតីបារាំង Emmanuel Macron កាលពីថ្ងៃព្រហស្បតិ៍ បន្ទាប់ពីកិច្ចពិភាក្សារបស់មេដឹកនាំទាំងពីរនៅទីក្រុងវ៉ាស៊ីនតោន ។

ប្រធានាធិបតីសហរដ្ឋអាមេរិកបាននិយាយថា “លោក ពូទីន កំពុងធ្វើបាប ក៏ដូចជាសម្លាប់លើប្រជាជនស៊ីវិលដ៏ឃោរឃៅក្នុងប្រទេសអ៊ុយក្រែន ដោយការទម្លាក់គ្រាប់បែកលើកន្លែងថែទាំទារក មន្ទីរពេទ្យ និងកន្លែងផ្សេងៗទៀត ហើយវាពិតជាឈឺចាប់ណាស់” ។

លោក បៃដិន បានបញ្ជាក់ថា នៅក្នុងការពិគ្រោះយោបល់ជាមួយសមាជិកណាតូផ្សេងទៀត, លោកនឹងរីករាយក្នុងការអង្គុយជាមួយលោក ពូទីន ដើម្បីពិភាក្សា ក៏ដូចជាស្ដាប់ពាក្យពេជន៍របស់ប្រធានាធិបតីរុស្ស៊ីដែលមាននៅក្នុងចិត្តនិយាយចេញមក” ។

ប៉ុន្តែទោះជាយ៉ាងណា លោក បៃដិន បាននិយាយថា លោក ពូទីន មិនទាន់បង្ហាញការចាប់អារម្មណ៍ចំពោះការអត្ថាធិប្បាយនេះនៅឡើយទេ ខណៈមិនទាន់មានការរំពឹងទុកណាមួយនៃកិច្ចពិភាក្សា ដែលនឹងត្រូវបានធ្វើឡើងនាពេលខាងមុខនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Xi Jinping ឲ្យបញ្ចៀសការឡើងកម្ដៅថែមទៀតក្នុងជម្លោះនៅ អ៊ុយក្រែន