FBI បើកការស៊ើបអង្កេតក្រុមហ៊ុនដាក់បន្ទះឈីបក្នុងខួរក្បាលរបស់លោក Elon Musk

យោងតាមការចុះផ្សាយរបស់សារព័ត៌មាន Reuters បានឲ្យដឹងថា ពេលនេះ​ FBI អាមេរិក កំពុងធ្វើការស៊ើបអង្កេត​លើក្រុមហ៊ុនបច្ចេកវិទ្យាខួរក្បាល Neuralink របស់លោក Elon Musk ​ទាក់ទងនឹងសុខុមាលភាពរបស់សត្វដែលត្រូវបានយកមកពិសោធន៍ ។

អតីតបុគ្គលិក និងបច្ចុប្បន្នចំនួន ២០ នាក់នៃក្រុមហ៊ុនបច្ចេកវិទ្យាសុខភាពបានប្រាប់ Reuters ថា បរិយា​កាសកន្លែងការងារនៅក្នុងក្រុមហ៊ុនលោក Musk បានបង្ខំឲ្យបុគ្គលិកធ្វើការទាំងប្រញាប់ប្រញាល់ ដែលបង្កើតឲ្យមាន​កំហុសឆ្គងមិនចេះចប់ ពេលធ្វើតេស្តសាកល្បងលើសត្វ ដោយបណ្តាលឲ្យសត្វត្រូវរងទុក្ខ និងស្លាប់ជាច្រើនក្បាល ។

បើតាមរបាយការណ៍បង្ហាញថា ចាប់តាំងពីឆ្នាំ ២០១៨ មក សត្វជាង ១,៥០០ ក្បាល​រួមមាន ស្វា ជ្រូក ចៀម ត្រូវបានស្លាប់ អំឡុងពេលពិសោធន៍បច្ចេកវិទ្យា​ Neuralink ។

បុគ្គលិក Neuralink បានបញ្ជាក់ទៀតថា អ្នកវិទ្យាសាស្ត្រ បានធ្វើការវះកាត់ពិសោធន៍ខុសជាច្រើនដង និងមិនជោគជ័យលើសត្វជាច្រើនក្បាល ហើយសត្វទាំងនោះ ក៏ត្រូវបានគេយកទៅសម្លាប់ចោល ហើយនាំយកសត្វថ្មី​មកពីសោធន៍ម្តងទៀត ។

ទោះបីជាមានបុគ្គលិកជាច្រើនរាយការណ៍ពីបញ្ហាសម្ពាធការងារក៏ដោយ ប៉ុន្តែ​លោក Musk ក៏ធ្លាប់និយាយប្រាប់អតីតបុគ្គលិក​ម្នាក់ថា​ លោកមិនចូលចិត្តប្រើសត្វសម្រាប់ការស្រាវជ្រាវឡើយ ហើយលោកចង់ឲ្យសត្វទាំងនោះ ក្លាយជាសត្វដែលរីករាយបំផុតនៅពេលនៅមានជីវិត ។

គួរបញ្ជាក់ថា នាពេលកន្លងមក ក្រុមហ៊ុន Neuralink ក៏ធ្លាប់ប្រឈមមុខនឹងការចោទប្រកាន់ម្តងរួចមកហើយពីការរំលោភបំពានសត្វ ។ ដោយកាលពីដើមឆ្នាំនេះ ក្រុមការពារសិទ្ធិសត្វមួយបានចោទប្រកាន់អ្នកស្រាវជ្រាវ Neuralink ថា បានដាក់ស្វាឲ្យ “រងទុក្ខយ៉ាងធ្ងន់ធ្ងរ” ខណៈពេលកំពុងធ្វើតេស្តការផ្សាំខួរក្បាល ៕

ប្រែសម្រួលដោយ ៖ រតនៈ

ប្រភព ៖ Yahoo

ចុចអាន ៖ រុស្ស៊ី កាន់តែរឹតបន្តឹងខ្លាំងលើអ្នកស្រលាញ់ភេទដូចគ្នា