ចិនរាយការណ៍អំពីការកើនឡើងនៃករណីឆ្លងកូវីដច្រើនបំផុតក្នុងរយៈពេល ៥ ខែ

ប្រទេសចិនបានរាយការណ៍អំពីការកើនឡើងនូវករណីឆ្លងជំងឺកូវីដ ១៩ ប្រចាំថ្ងៃច្រើនបំផុតក្នុងរយៈពេលជាង ៥ ខែ ខណៈដែលវាកើតឡើងនៅក្នុងខេត្ត Hebei ។

នៅថ្ងៃព្រហស្បតិ៍នេះគណៈកម្មការសុខភាពជាតិចិនបានរាយការណ៍ថា ខេត្ត Hebei កំពុងស្ថិតក្នុងសម័យសង្គ្រាម ខណៈដែលមានករណីឆ្លងចំនួន ៥១ ករណីក្នុងចំណោមករណីឆ្លងក្នុងស្រុកចំនួន ៥២ ករណី ។ ចំនួននេះបើប្រៀបធៀបទៅនឹង ២០ ករណីដែលត្រូវបានរាយការណ៍នៅក្នុងខេត្តនេះកាលពីលើកមុន ។

សរុបមកពេលនេះចិនដីគោកមានករណីឆ្លងថ្មីនៃជំងឺកូវីដ ១៩ ចំនួន ៦៣ ករណីបើប្រៀបធៀបនឹងរបាយការណ៍កាលពីមុនចំនួន ៣២ ករណីដែលជាការកើនឡើងនូវករណីឆ្លងធំបំផុតចាប់តាំងពីថ្ងៃទី ៣០ ខែកក្កដាដែលមានករណីឆ្លងចំនួន ១២៧ ករណី ។

ចំណែកចំនួនអ្នកជំងឺមិនមានរោគសញ្ញាដែលបានឆ្លងវីរុស SARS-CoV-2 ក៏បានកើនឡើងដល់ ៧៩ ករណីពី ៦៤ ករណី ។

ទន្ទឹមនោះអាជ្ញាធរនៅទីក្រុង Shijiazhuang រដ្ឋធានីរបស់ Hebei ដែលជាកន្លែងដែលមានករណីឆ្លងថ្មីភាគច្រើនបានបើកការធ្វើតេស្តទ្រង់ទ្រាយធំ និងហាមឃាត់ការប្រមូលផ្តុំដើម្បីកាត់បន្ថយការរីករាលដាលនៃមេរោគនេះ ។

បន្ថែមពីនេះអ្នកធ្វើដំណើរត្រូវតែបង្ហាញលទ្ធផលនៃការធ្វើតេស្តអវិជ្ជមានកូវីដ ១៩ ក្នុងរយៈពេល ៧២ ម៉ោងមុនពេលឡើងជិះរថភ្លើង ឬយន្តហោះនៅក្នុងខេត្ត ។

គួរបញ្ជាក់ថា ចំនួនសរុបនៃករណីឆ្លងជំងឺកូវីដ ១៩ នៅប្រទេសចិនដីគោកចាប់តាំងពីមានការផ្ទុះឡើងដំបូងនៅទីក្រុងអ៊ូហានកាលពីចុងឆ្នាំ ២០១៩ មានចំនួន ៨៧,២៧៨ ករណី ខណៈចំនួនអ្នកស្លាប់មាន ៤,៦៣៤ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ កាន់តែក្តៅ! លោក ស៊ី ចេញបញ្ជាឲ្យកងទ័ពចិនត្រៀមខ្លួនធ្វើសង្គ្រាមគ្រប់វិនាទី

ចុចអាន ៖ លទ្ធផលកោសល្យវិច័យលើនារីបម្រើការតាមយន្តហោះហ្វីលីពីន