ឥណ្ឌូនេស៊ី បញ្ចេញវីដេអូមួយទៀតអំពីប្រតិបត្តិការរុករកបំណែកយន្តហោះនៅបាតសមុទ្រ

ក្រុមអ្នកមុជទឹកឥណ្ឌូនេស៊ី បានធ្វើប្រតិបត្តិការក្នុងសមុទ្រជ្វា ដើម្បីរុករកកម្ទេចកម្ទីនិងទ្រព្យសម្បត្តិរបស់អ្នកដំណើរដោយសង្ឃឹមថា អាចរកឃើញប្រអប់ខ្មៅពីយន្តហោះដែលបានធ្លាក់កាលពីថ្ងៃសៅរ៍ ជាមួយមនុស្ស៦២នាក់ជិះក្នុងនោះ។

វីដេអូក្រោមទឹកនៃបេសកកម្មជួយសង្គ្រោះរបស់ពួកគេ បានបង្ហាញអ្នកមុជទឹកពិនិត្យមើលបំណែកដ៏ធំពីយន្តហោះ Boeing 737-500 របស់ក្រុមហ៊ុនអាកាសចរណ៍ Sriwijaya Air ដែលក្រុមអ្នកស៊ើបអង្កេតនិយាយថា នៅតែទាក់ទងបានពេលធ្លាក់ចូលសមុទ្រ។

កាបូបស្ពាយ Marvel របស់កុមារគឺស្ថិតក្នុងចំណោមរបស់របរដែលក្រុមអ្នកស្វែងរក បានរកឃើញនៅពេលពួកគេរើកកាយតាមបំណែកយន្តហោះ។

អ្នកដំណើរនិងអាកាសយានិកទាំងអស់៦២នាក់ដែលជិះក្នុងយន្តហោះនោះ គឺជាជនជាតិឥណ្ឌូនេស៊ីដោយក្នុងនោះមានកុមារ៧នាក់ និងទារក៣នាក់។

បុគ្គលិកប្រហែល២,៦០០នាក់ កំពុងធ្វើការក្នុងកិច្ចខិតខំប្រឹងប្រែងជួយសង្គ្រោះ​ ខណៈទូកនិងឧទ្ធម្ភាគចក្ររាប់សិបគ្រឿង បាននាំយកបំណែកយន្តហោះនិងសម្លៀកបំពាក់អ្នកដំណើរចេញពីទឹករាក់ជម្រៅប្រហែល ៧៥ហ្វីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថង់ដាក់សពត្រូវបានបញ្ជូនទៅមន្ទីរពេទ្យប៉ូលិស ដែលនៅទីនោះ ក្រុមអ្នកស៊ើបអង្កេតសង្ឃឹមថា អាចកំណត់អត្តសញ្ញាណជនរងគ្រោះដោយការពិនិត្យ DNA។

រហូតមកដល់ពេលនេះ ក្រុមអ្នកស៊ើបអង្កេតមិនទាន់អាចនិយាយពីមូលហេតុដែលយន្ដហោះអាយុ២៦ឆ្នាំនេះ ធ្លាក់ក្នុងរយៈពេលតែ៤នាទីបន្ទាប់ពីហោះចេញពីទីក្រុងហ្សាការតាបានទេ ប៉ុន្តែនិយាយថា ពួកគេដឹងទីតាំងរបស់ប្រអប់ខ្មៅនៅក្នុងសមុទ្រហើយ។

ការស្រង់បានប្រអប់ពណ៌ទឹកក្រូច ដែលកត់ត្រាសំឡេងកាប៊ីនយន្ដហោះនិងថតទិន្នន័យហោះហើរ ទំនងជាជួយពន្យល់ពីមូលហេតុដែលយន្ដហោះនេះធ្លាក់ចុះយ៉ាងលឿន៕

ប្រែសម្រួលដោយ៖ Vann Vann

ប្រភព៖ Daily Mail