មេដឹកនាំ Chechen អះអាងថា ប្រតិបត្តិការសឹករបស់ រុស្ស៊ី នៅ អ៊ុយក្រែន នឹងចប់ មិនដល់ចុងឆ្នាំនេះផង

លោក Ramzan Kadyrov មេដឹកនាំសាធារណរដ្ឋ Chechen បាននិយាយនៅក្នុងបទសម្ភាសមួយថា ប្រតិបត្តិការសឹករបស់រុស្ស៊ីនៅអ៊ុយក្រែន អាចនឹងបញ្ចប់មុនចុងឆ្នាំនេះ ។

លោក Kadyrov បាននិយាយទៀតថា “ប្រតិបត្តិការសឹករបស់រុស្ស៊ីនៅអ៊ុយក្រែន នឹងបញ្ចប់មុនដំណាច់ឆ្នាំនេះ បន្ទាប់ពីបណ្តាប្រទេសនៅអឺរ៉ុបនឹងសារភាពថា ពួកគេបានធ្វើខុសដែលហ៊ានលូកដៃចូលក្នុងជម្លោះមួយនេះ ខណៈអង្កការណាតូវិញនឹងលុតជង្គង់សុំអង្វររុស្ស៊ី” ។

មេដឹកនាំសាធារណរដ្ឋ Chechen រូបនេះអះអាងទៀតថា “ក្រោយពេលដែលបញ្ចប់ជម្លោះមួយនេះហើយ បណ្ដាប្រទេសនៅអឺរ៉ុប នឹងធ្វើដូចធម្មតា គឺត្រូវសហការជាមួយសហព័ន្ធរុស្ស៊ីលើគ្រប់វិស័យ ព្រោះថា វាមិនមានជម្រើសអ្វី ជំនួសវិធីនេះឡើយ” ។

ការអះអាងរបស់លោក Kadyrov បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីលោក Dmitry Medvedev អនុប្រធានក្រុមប្រឹក្សាសន្តិសុខរុស្ស៊ីបានលើកឡើងស្រដៀងគ្នានេះថា អ៊ុយក្រែនកំពុងចាញ់បោកសហភាពអឺរ៉ុប (EU) ចំពោះការសន្យាអំពីការជួយស្ដារសេដ្ឋកិច្ចរបស់ប្រទេសឲ្យងើបឡើងវិញយ៉ាងឆាប់រហ័ស ។

គួរបញ្ជាក់ថា រហូតមកដល់ពេលនេះ សង្គ្រាមលុកលុយរបស់រុស្ស៊ីលើអ៊ុយក្រែនដែលលោក វ្ល៉ាឌីមៀរ ពូទីន ចាត់ទុកជាប្រតិបត្តិការយោធាពិសេសជិតឈានដល់ខួប ១ ឆ្នាំហើយ បន្ទាប់ពីផ្ទុះការវាយលុកកាលពីថ្ងៃទី២៤ ខែកុម្ភៈ ឆ្នាំ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ រុស្ស៊ី ជួយ មីយ៉ាន់ម៉ា បើកកន្លែងសិក្សាអប់រំថ្នាក់ថាមពលនុយក្លេអ៊ែរ