អាមេរិក​ សាកល្បងមីស៊ីល​នុយក្លេអ៊ែរ ផ្ញើសារទៅ ពិភពលោក

កងទ័ពអាកាសអាមេរិកបាននិយាយនៅថ្ងៃសៅរ៍ទី១១ខែកុម្ភៈថា ការបាញ់បង្ហោះមីស៊ីលអន្តរទ្វីប Minuteman III (ICBM) កាលពីល្ងាចថ្ងៃសុក្រ គឺជាការសាកល្បងនៃការត្រៀមលក្ខណៈអាវុធនុយក្លេអ៊ែរ និងជាសារមួយទៅកាន់ពិភពលោក។

យោងតាមយោធា, មីស៊ីលដែលមានមូលដ្ឋានលើដីគោក ត្រូវបានបាញ់នៅម៉ោង១១យប់ចេញពីមូលដ្ឋានកងកម្លាំងអវកាស Vandenberg នៃរដ្ឋកាលីហ្វ័រញ៉ា ក្នុងសកម្មភាពជាមួយគោលបំណងបង្ហាញថា កម្លាំងនុយក្លេអ៊ែររបស់សហរដ្ឋអាមេរិកគឺមានសុវត្ថិភាព សន្តិសុខ អាចទុកចិត្តបាន និងមានប្រសិទ្ធភាព។

មីស៊ីលនេះបាន​​ធ្លាក់​នៅ​​តំបន់ Kwajalein Atoll លើ​កោះ Marshall ចម្ងាយ​ប្រហែល ៦៨០០ គីឡូម៉ែត្រពីទីតាំងបាញ់ចេញ។

ប្រធាន​ទីបញ្ជាការវាយប្រហារ​សកល​របស់កងទ័ពអាកាសអាមេរិក ឧត្តមសេនីយ៍ Thomas Bussiere បាននិយាយក្នុង​សេចក្តីថ្លែងការណ៍មួយថា “ការបាញ់សាកល្បងនេះ បង្ហាញពីគោលបំណងបេសកកម្មកំញើញរបស់យើងនៅលើឆាកពិភពលោក ដោយធានាដល់ប្រទេសជាតិ និងសម្ព័ន្ធមិត្តរបស់យើងថា អាវុធរបស់យើងមានសមត្ថភាព ហើយកងទ័ពអាកាសរបស់យើងបានត្រៀមខ្លួនរួចជាស្រេច និងមានឆន្ទៈក្នុងកិច្ចការពារសន្តិភាពនៅទូទាំងពិភពលោកក្នុងពេលឆាប់ៗនេះ​”។

ការបាញ់បង្ហោះនេះ កើតឡើងតែប៉ុន្មានថ្ងៃប៉ុណ្ណោះ បន្ទាប់ពីប្រទេសកូរ៉េខាងជើង បង្ហាញមីស៊ីលអន្តរទ្វីប Hwasong-17 របស់ខ្លួន ហើយកងទ័ពអាកាសអាមេរិកបានបាញ់ទម្លាក់ បាឡុងចារកម្មរបស់ចិនដែលបានហោះឆ្លងកាត់តំបន់អាមេរិកខាងជើង។

គួរបញ្ជាក់ថា មីស៊ីលអន្តរទ្វីប Minuteman III បានចូលបម្រើការក្នុងទសវត្សរ៍ឆ្នាំ១៩៧០ ហើយដាក់បញ្ចូលក្នុងកម្លាំងនុយក្លេអ៊ែរមុខបី របស់សហរដ្ឋអាមេរិក៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Biden ថា មីស៊ីល ដែលវាយប្រហារប៉ូឡូញ មិនទំនងជាបាញ់ចេញពី រុស្ស៊ី ទេ