ចិន​ អនុម័ត ​ពង្រីក​​ច្បាប់​ប្រឆាំង ​ចារកម្ម

កាលពីថ្ងៃពុធទី២៦ខែមេសា សមាជិកសភាចិន បានអនុម័តការធ្វើបច្ចុប្បន្នភាពកាន់តែទូលំទូលាយចំពោះច្បាប់ប្រឆាំងចារកម្មរបស់ទីក្រុងប៉េកាំង ដោយហាមឃាត់ការផ្ទេរព័ត៌មានទាក់ទងនឹងសន្តិសុខជាតិ និងពង្រីកនិយមន័យនៃពាក្យចារកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រព័ន្ធផ្សព្វផ្សាយរដ្ឋរាយការណ៍ថា ច្បាប់ប្រឆាំងចារកម្មដែលជាការអាប់ដេតលើកដំបូងចាប់តាំងពីឆ្នាំ២០១៤មកនេះ គឺត្រូវបានស្ថាប័ននីតិប្បញ្ញត្តិកំពូលរបស់ប្រទេសចិនអនុម័ត បន្ទាប់ពីការពិភាក្សារយៈពេលបីថ្ងៃ ហើយវានឹងចូលជាធរមានចាប់ពីថ្ងៃទី០១ខែកក្កដាទៅ។

ចាប់តាំងពីឡើងកាន់អំណាចក្នុងឆ្នាំ២០១២មក លោកប្រធានាធិបតី ស៊ី ជីនពីង បានយកសន្តិសុខជាតិធ្វើជាអទិភាពកំពូលនៃរដ្ឋបាលរបស់លោក ហើយអ្នកវិភាគនិយាយថា ការកែប្រែទាំងនេះគឺជាព័ស្តុតាងនៃការរឹតបន្តឹងរបស់រដ្ឋាភិបាល ចំពេលមានភាពតានតឹងជាមួយសហរដ្ឋអាមេរិក និងសម្ព័ន្ធមិត្ត។

បន្ទាប់ពីការកែប្រែនេះ, រាល់ឯកសារ ទិន្នន័យ សម្ភារ និងរបស់របរទាំងឡាយណាដែលទាក់ទងសន្តិសុខនិងផលប្រយោជន៍ជាតិ គឺស្ថិតក្រោមការការពារដូចគ្នាទៅនឹងការណ៍សម្ងាត់របស់រដ្ឋដែរ។

ទីភ្នាក់ងារព័ត៌មានរដ្ឋ Xinhua រាយការណ៍ថា ច្បាប់កែប្រែថ្មីនេះ ថែមទាំងពង្រីកនិយមន័យនៃពាក្យចារកម្មផងដែរ ពោលគឺចិន បានដាក់បញ្ចូលការវាយប្រហារតាមអ៊ីនធឺណិតប្រឆាំងនឹងស្ថាប័នរដ្ឋ ឬហេដ្ឋារចនាសម្ព័ន្ធព័ត៌មានសំខាន់ៗទៅក្នុងនោះ។

ច្បាប់ដែលកែប្រែនេះ អនុញ្ញាតឲ្យអាជ្ញាធរ បើកការស៊ើបអង្កេតប្រឆាំងនឹងចារកម្ម ដើម្បីចូលឆែកទិន្នន័យ ចូលឧបករណ៍អេឡិចត្រូនិក ពិនិត្យព័ត៌មានអំពីទ្រព្យសម្បត្តិផ្ទាល់ខ្លួន និងហាមឃាត់ការឆ្លងកាត់ព្រំដែនផងដែរ៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន ឃាត់ខ្លួនមនុស្ស១២នាក់ ក្នុងករណីអគ្គិភ័យឆាប ឆេះ មន្ទីរពេទ្យ ដ៏ប្រល័យ