គណបក្សប្រឆាំងថៃ កំពុងឈានទៅរកការឈ្នះឆ្នោត 

មេដឹកនាំគណបក្សចលនាឆ្ពោះទៅមុខ (MFP) លោក Pita Limjaroenrat បានស្ថិតនៅលើផ្លូវ ឈានទៅរកការកាន់កាប់តំណែងលេខមួយ ក្នុងការបោះឆ្នោតរបស់ប្រទេសថៃ។

យោងតាមលទ្ធផលក្រៅផ្លូវការពីគណៈកម្មាធិការរៀបចំការបោះឆ្នោត ដែលចេញផ្សាយកាលពីយប់ថ្ងៃអាទិត្យ ទី១៤ ខែឧសភា បានបង្ហាញថា​ គណបក្សរបស់បុរសអាយុ ៤២ ឆ្នាំរូបនេះ ទទួលបានការគាំទ្រនៅគ្រប់តំបន់ក្នុងប្រទេស ប៉ុន្តែមានសំឡេងប្រកៀកប្រកិតគ្នាជាមួយ គណបក្សភឿថៃ ។

ខណៈសន្លឹកឆ្នោតពីការិយាល័យបោះឆ្នោតចំនួន ៤៧,៩២៩ ក្នុងចំណោមការិយាល័យ ៩៥,១៣៧ នៅទូទាំងប្រទេសត្រូវបានរាប់នោះ គណបក្សចលនាឆ្ពោះទៅមុខ កំពុងឈានទៅរកការឈ្នះ ១៥១ អាសនៈក្នុងចំណោម ៥០០ អាសនៈនៃរដ្ឋសភា ខណៈផ្អែកលើទិន្នន័យបោះឆ្នោតដូចគ្នានេះ គណបក្សភឿថៃនឹងឈ្នះ ១៤៦ អាសនៈ ។

ទោះបីជាយ៉ាងណាក៏ដោយ លទ្ធផលចុងក្រោយអាចនឹងប្រែប្រួល ប៉ុន្តែវាបង្ហាញយ៉ាងច្បាស់ថា ទាំងគណបក្សចលនាឆ្ពោះទៅមុខ និងគណបក្សភឿថៃ គឺជាអ្នកឈ្នះនៅក្នុងការបោះឆ្នោតថ្ងៃទី១៤ ខែឧសភា ។

ចំណែក គណបក្ស ភូមិចៃថៃ របស់រដ្ឋមន្ត្រីសុខាភិបាលចាំផ្ទះ លោក Anutin Charnvirakul បានបញ្ចប់ក្នុងចំណាត់ថ្នាក់លេខ ៣ ដោយមាន ៦៩ អាសនៈ។

រីឯគណបក្សអំណាចប្រជាជន របស់ឧបនាយករដ្ឋមន្ត្រីចាំផ្ទះ Prawit Wongsuwan កំពុងឈរនៅចំណាត់ថ្នាក់លេខ៤ ជាមួយអាសនៈចំនួន ៣៤ ។

អ្វីដែលគួរឲ្យកត់សម្គាល់ គណបក្សថៃរួបរួមជាតិ របស់​នាយក​រដ្ឋមន្ត្រី​ផុត​អាណត្តិ​លោក ប្រាយុទ្ធ ចាន់អូចា ទទួលបានលទ្ធផលអាក្រក់មែនទែន ដោយឈរនៅលេខរៀងទី ៥ ជាមួយនឹងអាសនៈចំនួន ៣២ ៕

ប្រែសម្រួល៖ Vann Vann

ប្រភព៖ Nation

ចុចអាន៖ គណបក្សភឿថៃរបស់កូនស្រីលោក ថាក់ស៊ីន កំពុងនាំមុខ សំឡេងឆ្នោតបណ្ដោះអាសន្ន