ព័ត៌មានអន្ដរជាតិ

មិនមានពលរដ្ឋ ថៃ ច្រើនទេដែលទៅបោះឆ្នោតម្ដងទៀតក្នុងខេត្ត Nakhon Pathom

បានផុស

៣ years មុន

នៅ

ថ្ងៃអាទិត្យ ២១ ឧសភា ២០២៣

ដោយ

មិនមានប្រជាពលរដ្ឋច្រើននោះទេ ក្នុងចំណោមអ្នកដែលមានសិទ្ធិបោះឆ្នោតចំនួន ៩៤៣ នាក់បានអញ្ជើញទៅបោះឆ្នោតម្ដងទៀតនៅក្នុងមណ្ឌលបោះឆ្នោតលេខ១ នៃខេត្ត Nakhon Pathom នៅថ្ងៃអាទិត្យនេះ ហើយក៏ព្រោះតែមនុស្សជាច្រើនជឿជាក់ថា ការបោះឆ្នោតម្ដងទៀតនេះ នឹងមិនមានការប្រែប្រួលលទ្ធផលច្រើននោះទេ ។

ការរៀបចំបោះឆ្នោតឡើងវិញនៅខេត្តភាគកណ្ដាលប្រទេសថៃមួយនេះបានកើតឡើង បន្ទាប់ពីគណៈកម្មាធិការរៀបចំការបោះឆ្នោតខេត្ត បានសម្រេចចាត់ទុកជាមោឃៈនូវសន្លឹកឆ្នោតដែលប្រជាពលរដ្ឋបានបោះកាលពីថ្ងៃទី១៤ ខែឧសភាកន្លងទៅ ដោយសារតែការិយាល័យបោះឆ្នោតលេខ១០ ត្រូវបានដួលរលំដោយភ្លៀងធ្លាក់ខ្លាំង និងខ្យល់កន្ត្រាក់ ពោល ១៥ នាទី មុនពេលបិទការបោះឆ្នោត ។

ទន្ទឹមនោះមុនពេលគណៈកម្មាធិការប្រកាសបិទការបោះឆ្នោតនោះ ក៏មានអ្នកបោះឆ្នោតប្រមាណ ៨០ ភាគរយបានទៅបោះឆ្នោតនៅមណ្ឌលនោះរួចហើយផងដែរ ប៉ុន្តែគណៈកម្មាធិការបោះឆ្នោតខេត្តសម្រេចបើកការបោះឆ្នោតសាជាថ្មី ដោយសារតែមានអ្នកបោះឆ្នោតតែ ៧៦៣ នាក់ប៉ុណ្ណោះក្នុងចំណោម ៩៤៣ នាក់បានទៅបោះឆ្នោត ។

គួរបញ្ជាក់ថា នៅក្នុងការបោះឆ្នោតថ្ងៃទី១៤ ខែឧសភាកន្លងមកទៅ បេក្ខជនមកពីគណបក្សឆាតថៃផាតាណា (CTPP) បានឈ្នះក្នុងមណ្ឌលបោះឆ្នោតចំនួន ៣ ក្នុងចំណោមណ្ឌលចំនួន ៦ របស់ខេត្ត Nakhon Pathom ខណៈដែលគណបក្សចលនាឆ្ពោះទៅមុខ (MFP) បានឈ្នះនៅក្នុងមណ្ឌលទី៤ និងទី៥ ហើយគណបក្សថៃរួបរួមជាតិ (UTN) របស់លោក ប្រាយុទ្ធ បានឈ្នះនៅក្នុងមណ្ឌលទី២ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ថ្ងៃនេះ ខេត្តភាគកណ្ដាល ថៃ រៀបចំការបោះឆ្នោតសកលឡើងវិញ