តាមការពិត អ្នកដំណើរត្រូវចុះហត្ថលេខាលើលិខិតស្ម័គ្រស្លាប់សិន មុនជិះយានរបស់ក្រុមហ៊ុន OceanGate 

យោងតាមព័ត៌មានចុងក្រោយបានឲ្យដឹងថា អ្នកដំណើរទាំង៥ ដែលជិះយានជ្រមុជទឹក Titan ចុះទៅតំបន់ខ្មោចកប៉ាល់ទីតានិក គឺសុទ្ធតែបានចុះហត្ថលេខាលើលិខិតដែលបញ្ជាក់ពីហានិភ័យគ្រោះថ្នាក់ដល់ជីវិត រួចទៅហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ អ្នកកាសែត CBS ម្នាក់ ដែលធ្វើដំណើរជាមួយក្រុមហ៊ុន OceanGate ក្នុងខែកក្កដាឆ្នាំ២០២២ បានរាយការណ៍ថា ពេលនោះ លោកក៏បានចុះហត្ថលេខាលើលិខិតមួយ ដែលនិយាយអំពីសេចក្តីស្លាប់ផងដែរ។ ទោះបីជាយ៉ាងណាក៏ដោយ លិខិតនេះ មិនអាចជួយក្រុមហ៊ុនពីការចោទប្រកាន់ ឬការផ្តល់សំណងណាមួយបានឡើយ។

ភ្នាក់ងាររបស់ Reuters មិនអាចបញ្ជាក់ពីលក្ខខណ្ឌដែលមានចែង ក្នុងលិខិតនោះបានទេ ហើយក្រុមហ៊ុន OceanGate ក៏មិនបានឆ្លើយតបភ្លាមៗចំពោះសំណើសុំការអធិប្បាយដែរ។

កាលពីថ្ងៃព្រហស្បតិ៍ទី២២ខែមិថុនា ឆ្មាំសមុទ្រអាមេរិក បានរកឃើញបំណែកនៃយានជ្រមុជទឹក Titan នៅជិតខ្មោចកប៉ាល់ទីតានិក ហើយបញ្ជាក់ជាផ្លូវការថា អ្នកដំណើរ៥នាក់ បានស្លាប់អស់ហើយដោយសារការផ្ទុះយាននោះ ។

យានជ្រមុជទឹក Titan របស់ក្រុមហ៊ុន OceanGate បានបាត់ការទាក់ទងជាមួយនាវានៅផ្ទៃខាងលើឈ្មោះ Polar Prince ប្រហែល១ម៉ោង និង ៤៥ នាទី បន្ទាប់ពីការទម្លាក់ចូលទៅក្នុងទឹក ដើម្បីធ្វើដំណើរចុះទៅមើលខ្មោចកប៉ាល់ទីតានិក នៅព្រឹកថ្ងៃអាទិត្យទី១៨ខែមិថុនា។

គួរបញ្ជាក់ថា នាយកប្រតិបត្តិក្រុមហ៊ុន OceanGate លោក Stockton Rush, ទាហានជើងទឹកបារាំង Paul-Henry Nargeolet, មហាសេដ្ឋីអង់គ្លេស Hamish Harding, អ្នកជំនួញប៉ាគីស្ថាន Shahzada Dawood និងកូនប្រុសរបស់គាត់ឈ្មោះ Sulaiman Dawood គឺជាមនុស្សទាំង៥ ដែលជិះនៅក្នុងនោះ៕

ប្រែសម្រួល៖ Vann Vann

ប្រភព៖ CNA, Daily Mail

ចុចអាន៖ មនុស្ស ៥នាក់ក្នុងយានជ្រមុជទឹក Titan ស្លាប់អស់ហើយ