អ្នកជំនាញចង្អុលទៅមូលហេតុមួយទៀត ធ្វើឲ្យយាន Titan ផ្ទុះ

បើតាមការលើកឡើងរបស់សាស្ត្រាចារ្យផ្នែកមេកានិច និងវិស្វកម្មសមុទ្រនៃសាកលវិទ្យាល័យ Plymouth លោក Jasper Graham-Jones ប្រាប់ទៅកាសែត Business Insider កាលពីចុងសប្តាហ៍ថា ការផ្ទុះយានជ្រមុជទឹក Titan ភ្លាមៗបន្ទាប់ពីការចុះមហាសមុទ្រ ក្នុងដំណើរទៅមើលខ្មោចកប៉ាល់ទីតានិកកាលពីខែមុន ទំនងជាដោយសារតែ ស្នាមប្រេះតូចៗនៅតួយាន ដែលជាហេតុបណ្តាលឲ្យវាមិនអាចទប់ទល់នឹងសម្ពាធបាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Graham-Jones និយាយថា ការធ្វើដំណើរចុះទឹកកាន់តែជ្រៅ បានបង្កើតជាស្នាមប្រេះតូចៗនៅក្នុងសម្ភារ ធ្វើឲ្យយានរងសម្ពាធបន្តិចម្តងៗ រហូតធ្វើឲ្យវាផ្ទុះ។

បំណែកយានជ្រមុជទឹក Titan ត្រូវបានស្រង់ឡើងគោក ដោយឆ្មាំឆ្នេរសមុទ្រកាណាដាក្នុងទីក្រុង Newfoundland កាលពីដើមសប្តាហ៍មុន ដើម្បីឲ្យអ្នកជំនាញ និងអ្នកត្រួតពិនិត្យផ្សេងទៀត មើលឃើញផ្ទាល់ភ្នែកចំពោះយានទេសចរណ៍បាតសមុទ្ររបស់ក្រុមហ៊ុន OceanGate។

គួរបញ្ជាក់ជាថ្មី យានជ្រមុជទឹក Titan បានបាត់បង់ទំនាក់ទំនងជាមួយកប៉ាល់មេ​ នៅផ្ទៃខាងលើ ពោលគឺរយៈពេលជាងមួយម៉ោង បន្ទាប់ពីចេញដំណើរចុះទៅបាតមហាសមុទ្រអាត្លង់ទិកនៅថ្ងៃទី១៨ ខែមិថុនា ។

ទីបំផុត បំណែកយាន ត្រូវបានរកឃើញនៅ ៤ ថ្ងៃក្រោយមក ហើយអ្នកដំណើរ ៥ នាក់ដែលជិះក្នុងនោះ ស្លាប់ទាំងអស់ រួមមាននាយកប្រតិបត្តិក្រុមហ៊ុន OceanGate លោក Stockton Rush និងមនុស្ស ៤ នាក់ផ្សេងទៀត ដែលបានចំណាយប្រាក់ ២៥ ម៉ឺនដុល្លារក្នុងម្នាក់ សម្រាប់ការចុះទៅទស្សនាខ្មោចកប៉ាល់ទីតានិក ៕

ប្រែសម្រួល៖ Vann Vann

ប្រភព៖ RT

ចុចអាន៖ យានជ្រមុជទឹក Titan នឹងត្រូវគេផ្គុំឡើងវិញ