អាមេរិក ត្រៀមបញ្ជូន រ៉ុកកែត “បិសាចជញ្ជក់ឈាម” ទៅឲ្យ អ៊ុយក្រែន

អាមេរិក គ្រោងប្រកាសកញ្ចប់សព្វាវុធថ្មីក្នុងទំហំទឹកប្រាក ១.៣ពាន់លានដុល្លារទៅឲ្យអ៊ុយក្រែន រួមទាំងយន្តហោះគ្មានមនុស្សបើកអត្តឃាតជាច្រើនប្រភេទ និងប្រព័ន្ធបាញ់រ៉ុកកែត VAMPIRE (បិសាចជញ្ជក់ឈាម) ដែលទើបបង្កើតថ្មីផងដែរ។ នេះបើយោងតាមការចុះផ្សាយរបស់ Reuters។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការចេញផ្សាយរបស់ Reuters​ កាលពីថ្ងៃអង្គារទី១៨ខែកក្កដា ដោយដកស្រង់សម្តីមន្ត្រីអាមេរិកពីររូប, ជំនួយយោធាចុងក្រោយបំផុតនេះ នឹងត្រូវប្រកាសក្នុងរយៈពេលប៉ុន្មានថ្ងៃខាងមុខ។

ផលិតដោយក្រុមហ៊ុនម៉ៅការអាវុធអាមេរិក L3Harris, រ៉ុកកែតបិសាចជញ្ជក់ឈាម អាចត្រូវបានបំពាក់នៅលើរថយន្តភាគច្រើន រួមទាំងរថយន្តភីកអាប់ស៊ីវិលផងដែរ។ សព្វាវុធនេះ មានឧបករណ៍ចាប់សញ្ញាគោលដៅ និងឧបករណ៍បាញ់បង្ហោះ ភ្ជាប់ជាមួយឡាស៊ែរចំនួនបួន ហើយអាចបញ្ជាដោយមនុស្សតែម្នាក់ ប្រឆាំងនឹងគោលដៅទាំងនៅលើអាកាស និងដីគោក។

កាលពីឆ្នាំមុន រ៉ុកកែតបិសាចជញ្ជក់ឈាម ត្រូវបានប្រកាសផ្តល់ឲ្យទីក្រុងកៀវក្នុងខែសីហាឆ្នាំមុន ហើយក្រោយមក ក្រុមហ៊ុន L3Harris បញ្ជាក់ថា ខ្លួនបានទទួលកិច្ចសន្យាទំហំទឹកប្រាក់៤០លានដុល្លារអាមេរិក ដើម្បីចែកចាយប្រព័ន្ធនេះចំនួន៤នៅពាក់កណ្តាលឆ្នាំ២០២៣ និង១០ទៀតនៅចុងឆ្នាំនេះ។

គួរបញ្ជាក់ថា ចាប់តាំងពីជម្លោះរុស្ស៊ី-អ៊ុយក្រែន បានផ្ទុះឡើងកាលពីឆ្នាំមុនមក ប្រធានាធិបតីអាមេរិកលោក ចូ បៃដិន បានផ្តល់ជំនួយសព្វាវុធឲ្យទីក្រុងកៀវដោយផ្ទាល់ចំនួន៤១.៣ពាន់លានដុល្លារ និងជាង១០ពាន់លានដុល្លារនៅក្រោមកម្មវិធីផ្តួចផ្តើមជំនួយសន្តិសុខអ៊ុយក្រែន (USAI)៕

ប្រែសម្រួល៖ Vann Vann

ប្រភព៖ RT

ចុចអាន៖ លោក ត្រាំ ប្រកាសឲ្យអឺរ៉ុប ត្រៀមខ្លួនសងលុយអាមេរិក សម្រាប់អាវុធដែលបញ្ជូនទៅ អ៊ុយក្រែន