លោក Wang Yi ប្រាប់នាយករដ្ឋមន្ត្រី សិង្ហបុរី ថា អាមេរិក ជាប្រភពអស្ថិរភាព​ធំបំផុតនៅលើពិភពលោក

រដ្ឋមន្ត្រីការបរទេសចិន លោក Wang Yi បាននិយាយនៅក្នុងកិច្ចប្រជុំជាមួយនាយករដ្ឋមន្ត្រីសិង្ហបុរី លោក Lee Hsien Loong ថា សកម្មភាពរបស់សហរដ្ឋអាមេរិកប្រឆាំងនឹងប្រទេសចិនបង្ហាញយ៉ាងច្បាស់ថា រដ្ឋាភិបាលទីក្រុងវ៉ាស៊ីនតោន គឺជាប្រភពនៃអស្ថិរភាពដ៏ធំបំផុតនៅក្នុងពិភពលោក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដងស្រង់សម្ដីដោយគេហទំព័រក្រសួងការបរទេសចិន, លោក Wang Yi បានលើកឡើងថា “សហរដ្ឋអាមេរិកកំពុងទម្លាក់របាំងនៃការប្រកួតប្រជែងដោយយុត្តិធម៌ នៅពេលដែលប្រទេសនេះបង្ខិតបង្ខំប្រទេសផ្សេងទៀតឲ្យចូលរួមក្នុងកិច្ចគាំពារនិយមឯកតោភាគីប្រឆាំងនឹងប្រទេសចិន” ។

រដ្ឋមន្ត្រីការបរទេសចិនរូបនេះបានប្រាប់លោក Lee Hsien Loong ទៀតថា សកម្មភាពទាំងនេះនឹងធ្វើឲ្យខូចទំនុកចិត្តលើទីក្រុងវ៉ាស៊ីនតោន និងបង្ហាញឲ្យពិភពលោកដឹងថា សហរដ្ឋអាមេរិកបានក្លាយជាកត្តាអស្ថិរភាពដ៏ធំបំផុតនាពេលបច្ចុប្បន្ននេះ ។

បច្ចុប្បន្នលោក Wang Yi កំពុងអញ្ជើញធ្វើទស្សនកិច្ចមកកាន់ប្រទេសអាស៊ានចំនួន ៣ រួមមាន សិង្ហបុរី ម៉ាឡេស៊ី និងកម្ពុជា ចាប់ពីថ្ងៃទី១០ ដល់ថ្ងៃទី១៣ ចំពេលមានភាពតានតឹងរវាងទីក្រុងប៉េកាំង និងទីក្រុងម៉ានីល នៅក្នុងសមុទ្រចិនខាងត្បូង ។

ស្របពេលជាមួយគ្នានេះ លោក Wang Yi កំពុងធ្វើដំណើរទស្សនកិច្ចនៅប្រទេសម៉ាឡេស៊ី ហើយបន្ទាប់ពីបញ្ចប់ដំណើរទស្សនកិច្ចនៅទីក្រុងគូឡាឡាំពួរួចហើយ, រដ្ឋមន្ត្រីការបរទេសចិនរូបនេះ នឹងបន្តអញ្ជើញមកព្រះរាជាណាចក្រកម្ពុជានៅរសៀលថ្ងៃទី១២ ខែសីហា ឆ្នាំ២០២៣ នេះ ។

គួរបញ្ជាក់ថា អាស៊ាន គឺជាដៃគូពាណិជ្ជកម្មដ៏ធំបំផុតរបស់ប្រទេសចិន ចាប់តាំងពីឆ្នាំ ២០២០ មក ខណៈដែលសិង្ហបុរី ម៉ាឡេស៊ី និងកម្ពុជា ស្ថិតក្នុងចំណោមគោលដៅកំពូលសម្រាប់ការចូលរួមគម្រោងខ្សែក្រវាត់ និងផ្លូវរបស់ចិនក្នុងរយៈពេល ២ ឆ្នាំចុងក្រោយនេះ ៕

ប្រែសម្រួលដោយ ៖ ជីវ័ន្ត

ប្រភព ៖ TASS