រញ្ជួយដីខ្លាំងក្លា វាយប្រហារប្រទេសម៉ារ៉ុក ស្លាប់មនុស្សជិត ៣០០នាក់

គ្រោះរញ្ជួយដីកម្រិត ៦.៩រ៉ិចទ័រ បានវាយប្រហារប្រទេសម៉ារ៉ុក កាលពីយប់ថ្ងៃសុក្រ (ព្រឹកថ្ងៃសៅរ៍នៅកម្ពុជា) ដោយបានសម្លាប់មនុស្សចំនួន២៩៦នាក់ និងបណ្តាលឲ្យអគារជាច្រើន ត្រូវបាក់រលំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគច្រើននៃអ្នកស្លាប់ ត្រូវបានគេរាយការណ៍ ស្ថិតនៅក្នុងតំបន់ពិបាកចូលទៅដល់នៃទីក្រុង Marrakesh។ ក្រៅពីអ្នកស្លាប់ មានមនុស្សប្រហែល១៥០នាក់ផ្សេងទៀត រងរបួស។

វិហារឥស្លាមមួយ ត្រូវខូចខាតនៅជិតទីលាន Jemaa el-Fnaa ក្នុងទីក្រុងចាស់ Marrakesh ដែលជាតំបន់បេតិកភណ្ឌពិភពលោករបស់អង្គការយូណេស្កូ ក៏ដូចជាអគារប្រវត្តិសាស្ត្រផ្សេងទៀតនៅក្នុងតំបន់នេះផងដែរ។

យោងតាមមជ្ឈមណ្ឌលរញ្ជួយដីអ៊ឺរ៉ុប-មេឌីទែរ៉ាណេ (EMSC), ការរញ្ជួយដី បានវាយប្រហារនៅម៉ោងប្រហែល ១១:១១ យប់ (ម៉ោងនៅម៉ារ៉ុក) ជាមួយជម្រៅ១០គីឡូម៉ែត្រ ខណៈចំណុចកណ្តាលនៃការរញ្ជួយ ត្រូវបានចុះបញ្ជីនៅចម្ងាយប្រហែល៧៧គីឡូម៉ែត្រពីទីក្រុង Marrakesh។

របាយការណ៍​ខាងលើ​កត់​សម្គាល់​ថា ការ​រញ្ជួយ​ដី​នេះ ​រង្គើដល់​ទីក្រុង​ឆ្នេរ​សមុទ្រ Rabat, Casablanca និង Essaouira ឯណោះ៕

ប្រែសម្រួល៖ Vann Vann

ប្រភព៖ Sputnik, SKY

ចុចអាន៖ ខេត្តវៀតណាម ជាប់កម្ពុជា រញ្ជួយដី ២៨លើក ត្រឹម៤ថ្ងៃ