ប្រេស៊ីល ធានាថា លោក Putin នឹងមិនត្រូវចាប់ខ្លួនក្នុងកិច្ចប្រជុំកំពូល G20 នៅឆ្នាំ ២០២៤ ឡើយ

ប្រធានាធិបតីប្រេស៊ីលលោក Luiz Inacio Lula da Silva បាននិយាយកាលពីពេលថ្មីៗនេះថា ប្រធានាធិបតីរុស្ស៊ីលោក Vladimir Putin នឹងមិនត្រូវបានចាប់ខ្លួននៅក្នុងប្រទេសប្រេស៊ីលឡើយ ប្រសិនបើមេដឹកនាំរូបនេះចូលរួមកិច្ចប្រជុំកំពូលនៃក្រុមប្រទេស G20 នៅទីក្រុង Rio de Janeiro នាឆ្នាំក្រោយ ។

ក្នុងកិច្ចសម្ភាសន៍ជាមួយសារព័ត៌មាន Firstpost នៅខាងក្រៅកិច្ចប្រជុំ G20 ក្នុងរដ្ឋធានីញូវដេលី, លោក Lula បានលើកឡើងថា លោក Putin នឹងត្រូវបានអញ្ជើញឲ្យចូលរួមក្នុងកិច្ចប្រជុំកំពូល G20 នៅឆ្នាំក្រោយ ហើយរូបលោកផ្ទាល់ក៏គ្រោងនឹងចូលរួមកិច្ចប្រជុំនៃក្រុមប្រទេសកំពុងអភិវឌ្ឍន៍ BRICS ដែលនឹងរៀបចំឡើងនៅប្រទេសរុស្ស៊ី មុនពេលកិច្ចប្រជុំនៅទីក្រុង Rio ។

លោក Lula ជឿជាក់ថា “លោក Putin អាចអញ្ជើញទៅប្រទេសប្រេស៊ីលបានយ៉ាងងាយស្រួល ហើយអ្វីដែលខ្ញុំអាចនិយាយទៅកាន់អ្នកបាននោះគឺថា ប្រសិនបើខ្ញុំនៅតែជាប្រធានាធិបតីប្រេស៊ីល ហើយលោក Putin អញ្ជើញមកប្រទេសប្រេស៊ីលនោះ វាគ្មានផ្លូវដែលមេដឹកនាំរុស្ស៊ីរូបនេះនឹងត្រូវចាប់ខ្លួននោះទេ” ។

តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនលោក Putin កាលពីខែមីនា ដោយចោទប្រកាន់ប្រធានាធិបតីរុស្ស៊ីរូបនេះពីបទឧក្រិដ្ឋកម្មសង្រ្គាម ក្នុងការនិរទេសកុមាររាប់រយនាក់ចេញពីប្រទេសអ៊ុយក្រែនដោយខុសច្បាប់ ខណៈប្រេស៊ីលក៏ជាប្រទេសហត្ថលេខីនៃលក្ខន្តិកៈទីក្រុងរ៉ូមរបស់តុលាការឧក្រិដ្ឋកម្មអន្តរជាតិ (ICC) ផងដែរ ។

ប៉ុន្តែទោះជាយ៉ាងណា រដ្ឋាភិបាលទីក្រុងមូស្គូ​បាន​បដិសេធ​ថា កងកម្លាំង​របស់ប្រទេសរុស្ស៊ី​មិន​បាន​ជាប់​ពាក់ព័ន្ធ​នឹង​ឧក្រិដ្ឋកម្ម​សង្រ្គាម ឬ​បាន​បង្ខំ​កុមារ​អ៊ុយក្រែន ដូចការចោទប្រកាន់របស់តុលាការឧក្រិដ្ឋកម្មអន្តរជាតិ (ICC) ឡើយ ។

គួរបញ្ជាក់ថា ចាប់តាំងពីផ្ទុះសង្គ្រាមលុកលុយរបស់រុស្ស៊ីលើអ៊ុយក្រែនកាលពីឆ្នាំ២០២២ មក លោក Putin បានអវត្តមានកិច្ចប្រជុំលើឆាកអន្តរជាតិជាច្រើនលើកច្រើនសារ ជាពិសេសកិច្ចប្រជុំកំពូល G20 នៅទីក្រុងញូវដែលីកាលពីថ្ងៃសៅរ៍ ដោយបានបញ្ជូនរដ្ឋមន្ត្រីការបរទេសលោក Sergei Lavrov ទៅចូលរួមជំនួស ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ លោក Modi លែងប្រើឈ្មោះប្រទេស “ឥណ្ឌា” ក្នុងកិច្ចប្រជុំកំពូល G20