លោក Modi លែងប្រើឈ្មោះប្រទេស “ឥណ្ឌា” ក្នុងកិច្ចប្រជុំកំពូល G20

ផ្ទាំងស្លាកសម្គាល់ឈ្មោះប្រទេសរបស់លោកនាយករដ្ឋមន្ត្រី Narendra Modi នៅឯពិធីបើកកិច្ចប្រជុំកំពូលក្រុមប្រទេស G20 នៅថ្ងៃសៅរ៍នេះ មិនត្រូវបានគេមើលឃើញសរសេរថា “ឥណ្ឌា” នោះទេ ហើយត្រូវបានប្ដូរមកជាពាក្យថា “Bharat” វិញ ។

លោក Modi ត្រូវបានគេមើលឃើញអង្គុយនៅខាងក្រោយស្លាកឈ្មោះដែលសរសេរថា “Bharat” មិនមែន “ឥណ្ឌា” ដូចរាល់ដងនោះឡើយ ខណៈដែលនិមិត្តសញ្ញា G20 មានឈ្មោះទាំងពីរគឺ “Bharat” សរសេរជាភាសាហិណ្ឌូ និង “ឥណ្ឌា” ជាភាសាអង់គ្លេស ។

ពាក់ព័ន្ធនឹងបញ្ហានេះដែរ មានការសង្ស័យថា ប្រជាជាតិអាស៊ីខាងត្បូងមួយនេះ ពិតជានឹងមានការផ្លាស់ប្ដូរឈ្មោះប្រទេសប្រាកដមែន ។ ទោះយ៉ាងណា ទាំងឈ្មោះ “ឥណ្ឌា” និង “Bharat” គឺសុទ្ធសឹងតែជាឈ្មោះផ្លូវការ ពោលប្រទេសមួយនេះប្រើឈ្មោះណាមួយក៏បាន ។

គួរបញ្ជាក់ថា រដ្ឋធានីញូវដែលីកំពុងធ្វើជាម្ចាស់ផ្ទះនៃកិច្ចប្រជុំកំពូលក្រុមប្រទេស G20 ចាប់ពីថ្ងៃទី៩ ដល់ថ្ងៃទី១០ ខែកញ្ញា ខណៈប្រធានាធិបតីរុស្ស៊ីលោក វ្ល៉ាឌីមៀរ ពូទីន និងលោក ស៊ី ជីនពីង ប្រធានាធិបតីរបស់ប្រទេសចិន មិនមានវត្តមានចូលរួមឡើយ ដោយឲ្យតំណាងរៀង២ខ្លួនមកចួលរួមប្រជុំជំនួស ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ មុនទៅដល់ ឥណ្ឌា ដើម្បីចូលរួមកិច្ចប្រជុំ G20 តើយន្តហោះដឹកលោក បៃដិន ឈប់ចាក់សាំងនៅប្រទេសណា?