សម័យប្រជុំមហាសន្និបាតអង្គការសហប្រជាជាតិឆ្នាំនេះនឹងលើកយករបៀបវារៈចំនួន ៤

សម័យប្រជុំនៃមហាសន្និបាតអង្គការសហប្រជាជាតិ (UNGA) លើកទី ៧៨ ដែលប្រមូលផ្ដុំប្រមុខរដ្ឋ រដ្ឋាភិបាល រដ្ឋមន្ត្រី និងគណៈប្រតិភូមកពីប្រទេសជាសមាជិក នឹងប្រព្រឹត្តទៅក្នុងទីក្រុងញូវយ៉កសហរដ្ឋអាមេរិកនៅថ្ងៃទី១៩ ខែកញ្ញានេះ ។

តំណាងមកពីប្រទេសចំនួន ១៩៣ កំពុងអញ្ជើញចូលរួមជាបណ្ដើរៗហើយក្នុងកិច្ចចរចាកម្រិតខ្ពស់ប្រចាំឆ្នាំ ដែលប្រព្រឹត្តទៅនៅទីស្នាក់ការអង្គការសហប្រជាជាតិរៀងរាល់ខែកញ្ញា ខណៈលោក Dennis Francis មកពីប្រទេសទ្រីនីដាដ និងតូបាហ្គោ នឹងធ្វើជាប្រធាននៃសម័យប្រជុំលើកទី ៧៨ នេះ ។

ចំណែករបៀបវារៈនៃសម័យប្រជុំលើកទី ៧៨ នេះរួមមាន ការអភិវឌ្ឍន៍ប្រកបដោយនិរន្តរភាព បញ្ហាអាកាសធាតុ ការត្រៀមលក្ខណៈសម្រាប់ជំងឺរាតត្បាត និងតំបន់មានជម្លោះ ខណៈមូលបទចម្បងសម្រាប់កិច្ចពិភាក្សាក្នុងឆ្នាំនេះគឺ “ការកសាងទំនុកចិត្តឡើងវិញ និងបំផុសសាមគ្គីភាពក្នុងពិភពលោក” ។

ទន្ទឹមនោះ អគ្គលេខាធិការអង្គការសហប្រជាជាតិ (UN) លោក Antonio Guterres ក៏នឹងគូសបញ្ជាក់ពីការយកចិត្តទុកដាក់ជាចម្បងរបស់ UN ដើម្បី “បង្កើតផ្លូវថ្មី” នៅក្នុងបរិបទនៃគោលដៅអភិវឌ្ឍន៍ប្រកបដោយចីរភាព ដើម្បីសន្តិភាព វិបុលភាព វឌ្ឍនភាព និងចីរភាពសម្រាប់ទាំងអស់គ្នា ។

លោក Guterres បាននិយាយនៅក្នុងសេចក្តីថ្លែងការណ៍មួយថា កំណែទម្រង់នៅក្នុងអង្គការសហប្រជាជាតិ គឺចាំបាច់ដើម្បីឲ្យស្របទៅនឹងការពិតនៃពិភពលោកបច្ចុប្បន្ន ហើយអនុសាសន៍ជាក់ស្តែងរបស់លោកនឹងត្រូវបានលើកឡើងដើម្បីដោះស្រាយបញ្ហាប្រឈម និងការគំរាមកំហែងនាពេលបច្ចុប្បន្ន ។

ស្របពេលជាមួយគ្នានេះ បញ្ហាវិបត្តិនៅអ៊ុយក្រែនក៏​ទំនង​ជា​ស្ថិត​ក្នុង​របៀបវារៈ ​ក្នុង​អំឡុង​ពេល​កិច្ច​ចរចា​កម្រិត​ខ្ពស់​ដែល​​រំពឹង​ថា ​នឹង​លូកចូលជ្រៅ​ទៅ​ក្នុង​តំបន់​ជម្លោះ​ និង​សង្គ្រាម​ជា​សកល ហើយកិច្ចពិភាក្សានៅឆ្នាំនេះក៏មានចូលរួមពីសំណាក់លោក Volodymyr Zelensky ផងដែរ ខណៈនៅក្នុងសម័យប្រជុំមហាសន្និបាតកាលពីឆ្នាំមុនប្រធានាធិបតីអ៊ុយក្រែនរូបនេះបានផ្តល់សារតាមរយៈវីដេអូ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ តើលោក ពូទីន ធ្លាប់អញ្ជើញទៅ កូរ៉េខាងជើង ដែរឬទេ?