កូរ៉េខាងត្បូង បង្អួតសព្វាវុធទ្រង់ទ្រាយធំដ៏កម្រ ពេញក្រុងស៊េអូល ដើម្បីកំញើញ កូរ៉េខាងជើង 

ប្រទេសកូរ៉េខាងត្បូង បានរៀបចំក្បួនព្យុហយាត្រាយោធាទ្រង់ទ្រាយធំ ជាលើកដំបូង ក្នុងរយៈពេលមួយទសវត្សរ៍នៅថ្ងៃអង្គារទី២៦ខែកញ្ញា ដោយសព្វាវុធជាច្រើន រាប់ចាប់ពីមីស៊ីលផ្លោងទៅដល់ឧទ្ធម្ភាគចក្រវាយប្រហារ ត្រូវបានដង្ហែកាត់តាមទីក្រុងសេអ៊ូល ក្នុងការបង្ហាញកម្លាំងដ៏កម្រ ស្របពេលមានការគំរាមកំហែងពីប្រទេសកូរ៉េខាងជើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្បួនដង្ហែប្រារព្ធទិវាកងកម្លាំងប្រដាប់អាវុធនេះ មានការចូលរួមពីសំណាក់ទាហានរាប់ម៉ឺននាក់ និងរថក្រោះផលិតក្នុងស្រុករបស់កូរ៉េខាងត្បូង ក៏ដូចជាកាំភ្លើងធំ ព្រមទាំងយន្តហោះវាយប្រហារ និងដ្រូនផងដែរ។

គួរបញ្ជាក់ថា កូរ៉េ​ខាង​ត្បូង​បាន​រៀបចំក្បួន​ដង្ហែ​តាម​ដង​ផ្លូវ​យោធា​ លើក​ចុង​ក្រោយ​ក្នុង​ឆ្នាំ​២០១៣។

ព្រឹត្តិការណ៍ឆ្នាំនេះ កើតឡើងចំពេលប្រធានាធិបតីកូរ៉េខាងត្បូងលោក Yoon Suk Yeol បានប្រកាន់ជំហរម៉ឺងម៉ាត់លើកូរ៉េខាងជើង ដោយយកការបង្ហាញអាវុធនិងសមយុទ្ធយោធា ធ្វើជាមូលដ្ឋានគ្រឹះនៃយុទ្ធសាស្ត្រ ដើម្បីទប់ទល់នឹងកម្មវិធីនុយក្លេអ៊ែរនិងមីស៊ីលដែលកំពុងវិវឌ្ឍន៍របស់កូរ៉េខាងជើង។

ក្បួនព្យុហយាត្រាថ្ងៃអង្គារ បានចាប់ផ្តើមនៅឯមូលដ្ឋានទ័ពអាកាស Seongnam ជាយក្រុងសេអ៊ូល។ វាមានការបង្អួតជាសាធារណៈនូវមីស៊ីល Hyunmoo, ឧបករណ៍ស្ទាក់ចាប់មីស៊ីល L-SAM, យន្តហោះ F-35 និងយន្តហោះចម្បាំងដែលអភិវឌ្ឍក្នុងស្រុកដំបូងបង្អស់របស់ប្រទេសគឺ KF-21។

ក្រសួងការពារជាតិនិយាយថា ព្រឹត្តិការណ៍នេះ ក៏នឹងបង្ហាញពីការហោះហើររួមគ្នាដោយយន្តហោះយោធាកូរ៉េខាងត្បូងនិងសហរដ្ឋអាមេរិក ផងដែរ ដើម្បីបង្ហាញពីកម្លាំងការពាររួមគ្នា​។

ក្បួនដង្ហែនេះធ្វើឡើងមួយសប្តាហ៍ បន្ទាប់ពីមេដឹកនាំកូរ៉េខាងជើងលោក គីម ជុងអ៊ុន វិលត្រលប់ពីដំណើរនៅប្រទេសរុស្ស៊ី ដែលក្នុងអំឡុងពេលនោះ គាត់និងប្រធានាធិបតីរុស្ស៊ីលោក វ្ល៉ាឌីមៀរ ពូទីន បានយល់ព្រមជំរុញកិច្ចសហប្រតិបត្តិការយោធាជាមួយគ្នា។

ទោះបីជាយ៉ាងណាក៏ដោយ លោក Yoon និយាយថា ប្រសិនបើរុស្ស៊ី ជួយកូរ៉េខាងជើង បង្កើនកម្មវិធីសព្វាវុធរបស់ខ្លួនជាថ្នូរនឹងជំនួយសម្រាប់សង្គ្រាមនៅអ៊ុយក្រែនមែននោះ វានឹងជាការបង្កហេតុដោយផ្ទាល់៕

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងត្បូង គំរាមសងសឹកចាស់ដៃ ហើយថា កូរ៉េខាងជើង នឹងចប់ បើ គីម ជុងអ៊ុន បាញ់នុយក្លេអ៊ែរមែន