ប្រមុខ UN បារម្ភខ្លាំងចំពោះសង្គ្រាមនុយក្លេអ៊ែរ ខណៈកូរ៉េខាងជើង ចេះតែគំរាមផ្ទុះជម្លោះ

កាលពីថ្ងៃអង្គារទី២៧ខែកញ្ញា អគ្គលេខាធិការអង្គការសហប្រជាជាតិលោក Antonio Guterres បានព្រមាន ប្រឆាំងនឹងការប្រកួតប្រជែងអាវុធបរមាណូថ្មី ដែលនាំមកនូវការគំរាមកំហែងបំផ្លិចបំផ្លាញពិភពលោក ខណៈកូរ៉េខាងជើង ប្រកាសថា ឧបទ្វីបរបស់ខ្លួន កំពុងស្ថិតក្នុងគែមនៃសង្គ្រាមនុយក្លេអ៊ែរហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារតែប្រទេសមានអាវុធនុយក្លេអ៊ែរមួយនេះ កំពុងពង្រីកនិងធ្វើទំនើបកម្មឃ្លាំងអាវុធរបស់ពួកគេនោះ ប្រធាន UN បានអំពាវនាវឲ្យមានការជំរុញ ដើម្បីកាត់បន្ថយនិងលុបបំបាត់អាវុធទាំងនោះ។

លោក Guterres បានប្រាប់មហាសន្និបាត នៅថ្ងៃចុងក្រោយនៃសម័យប្រជុំប្រចាំឆ្នាំរបស់ខ្លួនថា “ការប្រកួតប្រជែងអាវុធថ្មីដ៏គួរឲ្យព្រួយបារម្ភ កំពុងចាប់ផ្តើមហើយ។ ចំនួនអាវុធនុយក្លេអ៊ែរអាចកើនឡើងជាលើកដំបូង ក្នុងរយៈពេលប៉ុន្មានទសវត្សរ៍ចុងក្រោយនេះ”។

លោកនិយាយថា “ការប្រើប្រាស់អាវុធនុយក្លេអ៊ែរ មិនថាពេលណា កន្លែងណា និងក្នុងបរិបទណាក៏ដោយ វានឹងបង្កមហន្តរាយដល់មនុស្សជាតិ”។

គិតត្រឹមពេលនេះ រុស្ស៊ី និង​អាមេរិក ​មាន​ឃ្លាំង​អាវុធ​ធំ​ជាង​គេ ប៉ុន្តែ​ចិន ក៏​មាន​ការ​កើន​ឡើង​យ៉ាង​ឆាប់​រហ័សផងដែរ។ លើសពីនេះ កូរ៉េ​ខាង​ជើង តែងតែ​ផ្គើន​នឹង​ពិភពលោក​ ជាមួយ​នឹង​កម្មវិធី​នុយក្លេអ៊ែរ​របស់​ខ្លួន និង​ការ​សាកល្បងមីស៊ីល​ម្តង​ហើយ​ម្តង​ទៀត។

យ៉ាងណាក្តី នៅក្នុងសុន្ទរកថារបស់ខ្លួន នៅមហាសន្និបាត UN ខែកញ្ញា ប្រទេសកូរ៉េខាងជើងបានចោទប្រកាន់គូប្រជែងធំបំផុត គឺសហរដ្ឋអាមេរិកថា កំពុងរុញឲ្យឧបទ្វីបនេះ ខិតកាន់តែជិតទៅគែមនៃសង្គ្រាមនុយក្លេអ៊ែរ។

លោក Kim Song ឯកអគ្គរដ្ឋទូតកូរ៉េខាងជើង ប្រចាំ UN បានបរិហារសកម្មភាពរបស់កូរ៉េខាងត្បូង ក្រោមការដឹកនាំរបស់លោកប្រធានាធិបតី Yoon Suk Yeol ដែលកំពុងធ្វើការ ដើម្បីកសាងកិច្ចសហប្រតិបត្តិការកាន់តែជិតស្និទ្ធជាមួយសហរដ្ឋអាមេរិក ក៏ដូចជាគូប្រជែងប្រវត្តិសាស្ត្រគឺជប៉ុនផងដែរ។

លោក Kim បាននិយាយថា “ដោយសារតែគោលនយោបាយដ៏គួរឲ្យអាម៉ាស់របស់ខ្លួន ដែលពឹងផ្អែកលើកងកម្លាំងខាងក្រៅ ឧបទ្វីបកូរ៉េកំពុងស្ថិតក្នុងស្ថានភាពដែលបង្កឲ្យមានគ្រោះថ្នាក់ដោយសង្គ្រាមនុយក្លេអ៊ែរ”៕

ប្រែសម្រួល៖ Vann Vann

ប្រភព៖ CNA

ចុចអាន៖ មហាសន្និបាត UN ថ្ងៃទី១៖ មេដឹកនាំពិភពលោក ចេញការព្រមានខ្លាំងៗ