លោក Trump ចូលខ្លួនក្នុងតុលាការសាជាថ្មីលើបទចោទប្រកាន់ក្លែងបន្លំ

អតីតប្រធានាធិបតីអាមេរិក លោក Donald Trump កាលពីថ្ងៃចន្ទបានចូលខ្លួនក្នុងតុលាការសាជាថ្មី ប៉ុន្តែការអញ្ជើញចូលក្នុងតុលាការលើកនេះ គឺដើម្បីការពារខ្លួនប្រឆាំងនឹងបទចោទប្រកាន់ពាក់ព័ន្ធសំណុំរឿងក្ដីបំប៉ោងតម្លៃទ្រព្យសម្បត្តិរបស់គាត់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គមេធាវីរដ្ឋញូវយ៉កលោកស្រី​ Letitia James បានប្តឹងលោក Trump រួមជាមួយកូនៗ ៣ នាក់ និងនាយកប្រតិបត្តិឈ្មោះ Allen Weisselberg កាលពីថ្ងៃទី២១ ខែកញ្ញា ពីបទក្លែងបន្លំផ្សេងៗ ។ លោកស្រីបាននិយាយថា ចុងចោទបានបំភាន់ទ្រព្យសម្បត្តិសុទ្ធរបស់លោក Trump រួមទាំងតម្លៃអចលនទ្រព្យរាប់ពាន់លានដុល្លារ ដើម្បីទទួលបានប្រាក់កម្ចី និងអត្ថប្រយោជន៍ពន្ធកាន់តែប្រសើរ ។

ទន្ទឹមនោះ លោកស្រី James បញ្ជាក់ច្បាស់ៗថា “មិនថា អ្នកមានអំណាចប៉ុណ្ណាទេ ហើយបើទោះបីជាអ្នកមានលុយមហាសាលយ៉ាងណាក៏ដោយ ច្បាប់គឺច្បាប់ អ្នកមិនអាចអង្គុយនៅលើច្បាប់បានឡើយ” ។

ស្របពេលជាមួយគ្នានេះ លោក Trump ក៏បានចោទប្រកាន់បកទៅលោកស្រី James វិញដែរថា “ពាក្យបណ្ដឹងនេះមានបង្កប់នូវហេតុផលនយោបាយ” ហើយលោកថែមទាំងបានហៅពាក្យបណ្តឹងនេះថាជា “ការបោកប្រាស់” ។ ជាពិសេសលោក Trump ​បានលើកឡើង​ថា បទឧក្រិដ្ឋដែលចោទ​ប្រឆាំងមកលើ​ខ្ញុំនៅពេលនេះ ក៏​ព្រោះតែ​យើង​មាន​មេធាវីដ៏​ពុករលួយនៅក្នុងប្រទេស ។

ទោះយ៉ាងណា ក្នុងសវនាការនោះមិនមានគណៈវិនិច្ឆ័យឡើយ ប៉ុន្តែលោកចៅក្រម Arthur Engoron បានចេញសេចក្ដីសម្រេចកាលពីសប្តាហ៍មុនហើយថា ចុងចោទបានប្រព្រឹត្ត “ការក្លែងបន្លំជាបន្តបន្ទាប់ និងម្តងហើយម្តងទៀត” ហើយចៅក្រមក៏នឹងចេញ​សេចក្ដីសម្រេច​លើ​ការផាក​ពិន័យណាមួយដែលចុងចោទត្រូវ​ប្រឈម​មុខផងដែរ ។

គួរបញ្ជាក់ថា អគ្គមេធាវីចង់បានការផាកពិន័យក្នុងទំហំទឹកប្រាក់ចំនួន ២៥០ លានដុល្លារ និងហាមប្រាមលោក Trump និងកូនប្រុស ២ នាក់របស់លោកមិនឲ្យធ្វើជាមន្រ្តីនៃអាជីវកម្មណាមួយនៅក្នុងទីក្រុងញូវយ៉កឡើយ ជាពិសេសអ្នកទាំងនោះ អាចបាត់បង់ការគ្រប់គ្រងលើអចលនទ្រព្យមួយចំនួនដែលមានឈ្មោះរបស់ពួកគេ រួមទាំងអគារ Trump Tower និងទីលានវាយកូនហ្គោលផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អឺរ៉ុប នឹងខំប្រឹងជួយ អ៊ុយក្រែន ដោយមិនចាំបាច់មាន អាមេរិក