អឺរ៉ុប នឹងខំប្រឹងជួយ អ៊ុយក្រែន ដោយមិនចាំបាច់ពឹង អាមេរិក

លោក Josep Borrell តំណាងជាន់ខ្ពស់ទទួលបន្ទុកគោលនយោបាយកិច្ចការបរទេស និងសន្តិសុខនៃសហភាពអឺរ៉ុប (EU) បាននិយាយថា ជំនួយយោធារបស់ EU ចំពោះប្រទេសអ៊ុយក្រែន មិនចាំបាច់អាស្រ័យលើការសម្រេចចិត្តរបស់សហរដ្ឋអាមេរិកនោះទេ ហើយទីក្រុងព្រុចសែលក៏គ្រោងនឹងខំប្រឹងបន្ត ក៏ដូចជាបង្កើនជំនួយយោធាបន្ថែមទៀតដល់កងកម្លាំងទីក្រុងកៀវផងដែរ ។

នៅពេលអ្នកសារព័ត៌មានសួរនាំអំពីប្រតិកម្មរបស់ EU ចំពោះសភាអាមេរិកដែលដកជំនួយយោធាសម្រាប់ទីក្រុងកៀវចេញពីច្បាប់ចំណាយរយៈពេលខ្លី, មន្ត្រីរូបនេះបញ្ជាក់ថា “យើងមិនរង់ចាំការសម្រេចចិត្តរបស់សហរដ្ឋអាមេរិកដើម្បីបង្កើនសំណើរបស់យើងដើម្បីគាំទ្រអ៊ុយក្រែននោះទេ” ។

លោក Borrell បាននិយាយទៀតថា ទីក្រុងព្រុចសែលនៅតែសោកស្តាយចំពោះការសម្រេចចិត្តរបស់សមាជិកសភាអាមេរិកចំពោះការដកជំនួយមួយនេះ ជាពិសេសវានឹងមិនមែនជាការសម្រេចចិត្តច្បាស់លាស់នោះទេ ប៉ុន្តែទោះជាយ៉ាងណា លោកសង្ឃឹមថា អ៊ុយក្រែនក៏នឹងបន្តទទួលបានការគាំទ្រពីសហរដ្ឋអាមេរិកដដែល” ។

ទន្ទឹមនោះ អ្នកការទូតកំពូលរបស់ប្លុកនេះបានលើកឡើងថា គណៈកម្មការ EU បានស្នើបង្កើតមូលនិធិសម្រាប់អ៊ុយក្រែនដែលមានតម្លៃ ៥២.៨ ពាន់លានដុល្លារ ហើយលោកថែមទាំងបានស្នើឲ្យបង្កើតមូលនិធិស្រដៀងគ្នានេះចំនួន ២១.១៣ ពាន់លានដុល្លារនៅក្នុងកិច្ចប្រជុំស្ដីពីសន្តិភាពអឺរ៉ុប និងនៅក្នុងកិច្ចប្រជុំរដ្ឋមន្ត្រីការបរទេសសហភាពអឺរ៉ុបនៅខែសីហា ។

គួរបញ្ជាក់ថា ការអត្ថាធិប្បាយរបស់លោក Borrell បានកើតមានឡើង ចំពេលដែលប្រតិបត្តិការវាយបករបស់អ៊ុយក្រែនដែលបន្តអូសបន្លាយពេល ៤ ខែមកនេះ រងការបរាជ័យយ៉ាងធ្ងន់ធ្ងរ ទោះបីជាមានការផ្ដល់ជំនួយយោធាយ៉ាងច្រើនសន្ធឹកសន្ធាប់ពីសំណាក់លោកខាងលិចក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ ប្រធានសភា អាមេរិក បង្ហាញទំនុកចិត្តថា រដ្ឋាភិបាលសហព័ន្ធនឹងចៀសផុត​ពីការបិទនៅខែក្រោយ