នាយកប្រតិបត្តិ​ Apple លក់ភាគហ៊ុនបានជាង ៤១​ លានដុល្លារ

នាយកប្រតិបត្តិក្រុមហ៊ុន Apple លោក Tim Cook បានលក់ភាគហ៊ុនដែលមានតម្លៃប្រហែល ៤១ លានដុល្លារបន្ទាប់ពីការបង់ពន្ធ ដែលជាការលក់ដ៏ធំបំផុតរបស់លោកក្នុងរយៈពេលជាង ២ ឆ្នាំ ខណៈដែលភាគហ៊ុនរបស់ក្រុមហ៊ុន Apple ធ្លាក់ចុះក្នុងកម្រិតមួយនាពេលថ្មីៗនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាមគណៈកម្មការមូលបត្រអាមេរិកបានឲ្យដឹងថា លោក Tim Cook បានលក់ភាគហ៊ុនប្រហែល ២៤១,០០០ ហ៊ុន​ ក្នុងចំណោមភាគហ៊ុនប្រហែល ២៧០,០០០ ផ្សេងទៀត ។ ប៉ុន្តែលោកនៅតែមានភាគហ៊ុនប្រហែល ៣.២៨ លានផ្សេងទៀត នៅក្នុងក្រុមហ៊ុនដែលមានមូលដ្ឋាននៅទីក្រុង Cupertino រដ្ឋកាលីហ្វ័រញ៉ា ដែលលោកធ្លាប់ធ្វើការអស់រយៈពេលជាង ២ ទសវត្សរ៍ ។

ទន្ទឹមនោះ ការលក់ភាគហ៊ុននេះកើតមានឡើង បន្ទាប់ពីលោកបានកាត់បន្ថយប្រាក់ខែប្រហែល ៤០ ភាគរយមកត្រឹម ៤៩ លានដុល្លារនៅឆ្នាំ ២០២៣ ។

ដោយឡែក នាយកប្រតិបត្តិ Apple ផ្សេងទៀតក៏បានបង្ហាញពីការលក់ភាគហ៊ុនផងដែរ រួមទាំងអនុប្រធានជាន់ខ្ពស់លោកស្រី Deirdre O’Brien និងលោកស្រី Katherine Adams ដែលបានលក់ភាគហ៊ុនចំនួន ១១.៣ លានដុល្លារក្នុងម្នាក់ៗ ។

គួរបញ្ជាក់ថា ការលក់ភាគហ៊ុនចុងក្រោយរបស់លោក Tim Cook គឺនៅក្នុងខែសីហា ឆ្នាំ ២០២១ នៅពេលដែលលោកបានលក់ភាគហ៊ុននៅក្នុងក្រុមហ៊ុន Apple ជាង ៧៥០ លានដុល្លារ បន្ទាប់ពីធ្វើជានាយកប្រតិបត្តិបានមួយទសវត្សរ៍ ហើយបន្ទាប់ពីបង់ពន្ធរួច លោកចំណេញបាន ៣៥៥ លានដុល្លារឯណោះ ៕

ប្រែសម្រួល៖ នាង រតនៈ

ប្រភព៖​ BNN Bloomberg