Apple ប្ដេជ្ញាបង្កើនការវិនិយោគនៅចិន ទោះ​មានភាពតានតឹងពាណិជ្ជកម្ម

នាយកប្រតិបត្តិក្រុមហ៊ុនបច្ចេកវិទ្យាអាមេរិក​ Apple លោក ធីម ឃុក (Tim Cook) កាលពីថ្ងៃពុធ បានប្តេជ្ញា​បង្កើនការវិនិយោគនៅក្នុងប្រទេសចិន បើទោះបីជាភាពតានតឹងផ្នែកពាណិជ្ជកម្មចិន-អាមេរិកកើនឡើងកាន់តែខ្លាំងក្ដី។ នេះបើតាមការចុះផ្សាយរបស់កាសែត South China Morning Post។

​លោក ឃុក បាន​ធ្វើការប្ដេជ្ញានេះ​ក្នុង​កិច្ចប្រជុំជាមួយលោក Li Lecheng ដែល​រដ្ឋមន្រ្តី​ក្រសួងឧស្សាហកម្ម និងបច្ចេកវិទ្យាព័ត៌មាន (MIIT) នៅទីក្រុងប៉េកាំង ​អំឡុងទស្សនកិច្ចរបស់លោក​ទៅចិន​លើក​ទី២ឆ្នាំនេះ។ ​

MIIT បាននិយាយ​ក្នុងសេចក្តីថ្លែងការណ៍​ថា ភាគីទាំង២ បាន «ផ្លាស់ប្តូរទស្សនៈលើការអភិវឌ្ឍន៍អាជីវកម្មរបស់ក្រុមហ៊ុន Apple ​ក្នុងប្រទេសចិន និងការពង្រឹងកិច្ចសហប្រតិបត្តិការក្នុងវិស័យព័ត៌មានអេឡិចត្រូនិក»។

ដោយលើកឡើងពី «ទីផ្សារដ៏ធំ» និង «ប្រព័ន្ធឧស្សាហកម្មពេញលេញ» របស់ប្រទេសចិន លោក Li បានប្តេជ្ញាថានឹងធានាឱ្យមាន «បរិយាកាសអាជីវកម្មអំណោយផលសម្រាប់ក្រុមហ៊ុនបរទេស រួមទាំងក្រុមហ៊ុន Apple» ​សម្រាប់​ទីផ្សារក្នុងស្រុក។

សេចក្តីថ្លែងការណ៍របស់ MIIT បាននិយាយថា លោក Cook បានទទួលស្គាល់ការគាំទ្ររបស់ក្រសួងសម្រាប់​ការអភិវឌ្ឍន៍អាជីវកម្ម​របស់ Apple ខណៈ​សន្យាថាក្រុមហ៊ុននឹង «បន្តបង្កើនការវិនិយោគរបស់ខ្លួននៅក្នុងប្រទេសចិន និងពង្រឹងកម្រិត និងគុណភាពនៃកិច្ចសហប្រតិបត្តិការជាមួយដៃគូចិន»។

គួរគូសបញ្ជាក់ថា ការប្ដេជ្ញារបស់ Apple នៅពេលនេះ ធ្វើឡើងចំពេលដែល​ភាពតានតឹងពាណិជ្ជកម្ម​អាមេរិក-ចិន បន្តតានតឹង ក្នុងបរិបទពន្ធរបស់សហរដ្ឋអាមេរិក។ កន្លងមក Apple បាន​ផ្លាស់ប្ដូរទីតាំងផលិតកម្ម​របស់ខ្លួនចេញពីចិន ទៅប្រទេសផ្សេងៗ ដូចជាឥណ្ឌា និងវៀតណាម ដើម្បីបញ្ចៀសពន្ធ ដែល​អាមេរិកកំណត់លើចិន។ ជាធម្មតា Apple ផលិតគ្រឿងអេឡិចត្រូនិក រួមទាំងទូរស័ព្ទម៉ាក iPhone នៅបរទេសដូចជាចិន ហើយនាំចូលទៅទីផ្សារអាមេរិក៕