ចម្លើយសារភាពបន្ថែមទៀតរបស់ក្មេងប្រុសដែលបាញ់ប្រហារសម្លាប់មនុស្សនៅផ្សារទំនើបក្រុង បាងកក

ជនសង្ស័យដែលបើកការបាញ់ប្រហារសម្លាប់មនុស្ស ២ នាក់ និង ៥ នាក់រងរបួសក្នុងផ្សារទំនើប Siam Paragon កណ្ដាលទីក្រុងបាងកកកាលពីដើមសប្ដាហ៍នេះ បានចេញការសារភាពជាបន្តបន្ទាប់ទាំងនៅមុន និងក្រោយកើតហេតុ ។

ជនសង្ស័យបានសារភាពថា រូបគេបានទូរសព្ទទៅលេខសង្គ្រោះបន្ទាន់ ១៩១ ដើម្បីប្រាប់ពីអត្តសញ្ញាណរបស់ខ្លួនទៅកាន់ប៉ូលិស ជាពិសេសបានអះអាងថា រូបគេជាជនដៃដល់ ហើយថែមទាំងប្រាប់ប៉ូលិសទៀតថា រូបគេស្ថិតនៅក្នុងហាងគ្រឿងសង្ហារឹមមួយកន្លែងនៅជាន់ទី ៣ នៃផ្សារទំនើបនោះ ។

បើ​តាម​លោក​ឧត្តមសេនីយ៍ឯក Panop Vorathanatchakul មេបញ្ជាការ​កង​ល្បាត និង​ប្រតិបត្តិការ​ពិសេសដែលប្រចាំនៅ​មជ្ឈមណ្ឌល​ហៅ​ទូរសព្ទ​សង្គ្រោះ​បន្ទាន់ ១៩១ បានឲ្យដឹងថា ខ្មាន់កាំភ្លើងថែមទាំងបានបញ្ជាក់ប្រាប់ទៀត រូបគេពាក់អាវពណ៌ខ្មៅ ខោជើងវែង និងពាក់មួក ហើយមានអាយុត្រឹមតែ ១៤ ឆ្នាំប៉ុណ្ណោះ ។

លោក Panop សង្កត់ធ្ងន់ថា សារសំឡេងពីក្មេងប្រុសនោះ ត្រូវបានបញ្ជូនបន្តតាមរយៈវិទ្យុទំនាក់ទំនងទៅកាន់ប៉ូលិសមូលដ្ឋាន ខណៈអ្នកឆ្លងឆ្លើយក៏បាននិយាយណែនាំឲ្យជនសង្ស័យដែលបើកការបាញ់សម្លាប់មនុស្សនោះ ឲ្យដាក់អាវុធចុះ និងប្រគល់ខ្លួនឲ្យប៉ូលិសផងដែរ ។

លោកមេបញ្ជាការក៏លើកឡើងផងដែរថា លោកបានតាមដានស្ថានការណ៍នេះយ៉ាងដិតដល់តាមរយៈការភ្ជាប់បណ្ដាញទូរសព្ទមួយទៀត ហើយស្ដាប់សារសំឡេងនោះបណ្ដើរទាក់ទងជាមួយមន្ត្រីប៉ូលិសមូលដ្ឋានបណ្ដើរ ហើយលោកតែងតែផ្តល់ការណែនាំឲ្យខ្មាន់កាំភ្លើងចុះចាញ់ផងដែរ ។

គួរបញ្ជាក់ថា ក្រោយកើតហេតុហើយ ប៉ូលិសថៃក៏បានបើកប្រតិបត្តិការឆែកឆេរផ្ទះរបស់ក្មេងប្រុសដែលជាខ្មាន់កាំភ្លើងនោះផងដែរ ហើយបានរកឃើញវត្ថុតាងមួយចំនួនដូចជា កាំភ្លើង ក៏ដូចជាទាំងគ្រាប់កាំភ្លើងពិត និងគ្រាប់កាំភ្លើងជ័រជាដើម ខណៈក្មេងប្រុសវ័យ ១៤ ឆ្នាំរូបនេះក៏ប្រឈមនឹងការចោទប្រកាន់ចំនួន ៥ ករណីផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS