ព័ត៌មានអន្ដរជាតិ

ក្រុមហាម៉ាស់ចាប់ក្មេងស្រីពិការដើរមិនរួច និយាយមិនកើតជាចំណាប់ខ្មាំង

បានផុស

៣ years មុន

នៅ

ថ្ងៃសៅរ៍ ១៤ តុលា ២០២៣

ដោយ

ក្រុមភេរវករហាម៉ាស់ បានចាប់ជំរិតក្មេងស្រីមានពិការភាពអាយុ១៧ឆ្នាំម្នាក់ដែលមិនអាចដើររួច ឬនិយាយបានផង ហើយនាងពឹងផ្អែកលើគ្រួសារចិញ្ចឹមតាមបំពង់ធ្វើជាចំណាប់ខ្មាំង។

ក្មេងស្រីអាយុ១៧ឆ្នាំម្នាក់ដែលមិនអាចដើរ ឬនិយាយបាន ហើយពឹងផ្អែកលើការចិញ្ចឹមតាមបំពង់ដោយគ្រួសាររបស់នាងត្រូវបានក្រុមភេរវករហាម៉ាស់ចាប់ធ្វើជាចំណាប់ខ្មាំងនៅក្នុងពិធីប្រគំតន្ត្រីមួយជាកន្លែងពួកគេបានបាញ់សម្លាប់មនុស្សជាង ២៦០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កុមារី Rut Perez ដែលមានជំងឺសាច់ដុំ និងឪពុករបស់នាងឈ្មោះ Eric បានបាត់ខ្លួនដែរ បន្ទាប់ពីការប្រគំតន្ត្រី Supernova ត្រូវបានវាយប្រហារដោយសកម្មប្រយុទ្ធហាម៉ាស់ដែលបានបើកការវាយលុកដ៏ហឹង្សាក្នុងប្រទេសអ៉ីស្រាអែលកាលពីថ្ងៃទី៧ ខែតុលា។

នារីឈ្មោះ Yamit ជាបងស្រីរបស់នាងបានធ្វើការអំពាវនាវតាមបណ្តាញទំនាក់ទំនងសង្គមជាបន្ទាន់ដើម្បីឲ្យផ្តល់ដំណឹង ប្រសិនបើមាននរណាម្នាក់បានឃើញប្អូនស្រីរបស់នាង បន្ទាប់ពីនាងបានចាកចេញពីការប្រគំតន្ត្រីជាមួយមិត្តភក្តិ។

ចាប់តាំងពីពេលនោះមក នាងបានអង្វរដល់ក្រុមហាម៉ាស់ឲ្យអនុញ្ញាតឲ្យឪពុករបស់នាងមើលថែប្អូនស្រី Rut ប្រសិនបើទាំងឪពុក និងប្អូនស្រីមានជីវិតរស់នៅ។

នាង Yamit អាយុ២០ឆ្នាំ និងម្តាយឈ្មោះ Elinor ដែលប្រើរទេះរុញស្ថិតក្នុងចំណោមក្រុមគ្រួសាររាប់រយនាក់ដែលបានជូបជុំគ្នានៅ Tel Aviv រៀបរាប់ពីកិច្ចខិតខំប្រឹងប្រែងឲ្យចំណាប់ខ្មាំង១៥០ត្រឡប់ទៅផ្ទះវិញដែលក្រុមហាម៉ាស់បានចាប់ក្នុងការវាយប្រហារនៅតំបន់ហ្គាហ្សាកាលពីថ្ងៃសៅរ៍មុន។

ថ្លែងទៅកាន់កាសែត The Times នាង Yamit បាននិយាយថា ៖«ខ្ញុំកំពុងអង្វរដល់ក្រុមហាម៉ាស់ ឲ្យឪពុករបស់ខ្ញុំមើលថែប្អូនស្រីខ្ញុំ។ គាត់គឺជាមនុស្សតែម្នាក់គត់ដែលដឹងពីអ្វីដែលប្អូនស្រីរបស់ខ្ញុំត្រូវការ»៕

ប្រែសម្រួល៖ វីរបុត្រ
ប្រភព៖ Dailymail