អាហ្វ្រិកខាងត្បូងអំពាវនាវឱ្យកងកម្លាំង UN ការពារជនស៊ីវិលនៅហ្គាហ្សា ក្រោយអ្នកស្លាប់ កើនលើស ៨ពាន់នាក់

នៅថ្ងៃចន្ទ ទី៣០ ខែតុលា នេះ អាហ្រ្វិកខាងត្បូងធ្វើការអំពាវនាវឱ្យអង្គការសហប្រជាជាតិដាក់ពង្រាយកងកម្លាំងយ៉ាងឆាប់រហ័ស ដើម្បីការពារជនស៊ីវិលនៅក្នុងតំបន់ហ្គាហ្សានៃប្រទេសប៉ាឡេស្ទីនពីការទម្លាក់គ្រាប់បែកបន្ថែមទៀតរបស់អ៊ីស្រាអែល ក្រោយអ៊ីស្រាអែលបង្កើនការសងសឹករបស់ខ្លួនទៅលើក្រុមសកម្មប្រយុទ្ធហាម៉ាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការអំពាវនាវឱ្យមានកម្លាំងការពារលើជនស៊ីវិល អាហ្រ្វិកខាងត្បូងបានបន្តការគាំទ្ររបស់ខ្លួនសម្រាប់ជនជាតិប៉ាឡេស្ទីន ស្របពេលប្រទេសមួយចំនួនលើលោកអំពាវនាវឱ្យមានបទឈប់បាញ់ ឬការបើកច្រករបៀងមនុស្សធម៌ ដើម្បីអនុញ្ញាតឱ្យផ្តល់ជំនួយទៅកាន់តំបន់ហ្គាហ្សា។

សេចក្តីថ្លែងការណ៍មួយនិយាយថា សមាជិកនៃសហគមន៍ប៉ាឡេស្ទីននៅទីក្រុង Johannesburg មានសមាជិកគ្រួសារចំនួន ២៥នាក់ ត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលកាលពីព្រឹកថ្ងៃចន្ទ ខណៈដែលសមាជិកគ្រួសាររបស់អ្នកការទូតជាន់ខ្ពស់ប៉ាឡេស្ទីននៅអាហ្វ្រិកខាងត្បូងត្រូវបានសម្លាប់នៅក្នុងអគារផ្ទះល្វែងរបស់ពួកគេកាលពីថ្ងៃអាទិត្យ។

អាជ្ញាធរ​វេជ្ជសាស្រ្ដ​នៅ​ហ្គាហ្សា​​និយាយ​កាល​ពី​ថ្ងៃ​អាទិត្យ​ថា មនុស្ស ៨,០០៥​នាក់​ត្រូវ​បាន​សម្លាប់​ក្នុង​សង្គ្រាម​រយៈ​ពេល​បី​សប្តាហ៍មកនេះ។ ថ្វីត្បិតអំពាវនាវឱ្យអង្គារសហប្រជាតិជួយការពារជនស៊ីនៅតំបន់ហ្គាហ្សា ប៉ុន្តែប្រធានាធិបតីអាហ្រ្វិកខាងត្បូងលោក Cyril Ramaphosa និយាយថា ខ្លួនមិនគាំទ្រទង្វើរបស់ក្រុមហាម៉ាស់ឡើយ៕

ប្រែសម្រួល៖ សន្យា

ប្រភព៖ CNA

ចុចអាន៖ រថក្រោះអ៊ីស្រាអែលបាញ់ប្រហារលើរថយន្តដឹកជនស៊ីវិលនៅតំបន់ហ្គាហ្សា