ព័ត៌មានអន្ដរជាតិ

មហាសេដ្ឋីឥណ្ឌា Ambani ត្រូវជនអនាមិកគំរាមទារប្រាក់៥០លានដុល្លារជាថ្នូរនឹងជីវិត

បានផុស

៨ ខែ មុន

នៅ

ថ្ងៃពុធ ១ វិច្ឆិកា ២០២៣

ដោយ

កាលពីចុងខែតុលា ក្រុមហ៊ុន Reliance Industry Group ដែលជាក្រុមហ៊ុនរបស់មហាសេដ្ឋីឥណ្ឌា Mukesh Ambani បានទទួលអ៊ីមែលអនាមិកទាមទារប្រាក់ចំនួន ៤ ពាន់លានរូពី (ប្រហែល ៥០ លានដុល្លារអាមេរិក) ជាថ្នូរនឹងជីវិតលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mukesh Ambani បច្ចុប្បន្នត្រូវបានគេចាត់ទុកថាជាអ្នកមានបំផុតនៅអាស៊ីដោយទ្រព្យសម្បត្តិសុទ្ធ។ នេះជាអ៊ីមែលជំរិតទីបីដែលបានផ្ញើទៅក្រុមហ៊ុន Reliance Industry ក្នុងរយៈពេលតែ ៤ ថ្ងៃប៉ុណ្ណោះ។ អ្នកដែលសរសេរសំបុត្រនេះបានគំរាមថា ប្រសិនបើលោក Mukesh Ambani មិនបានបំពេញតាមសំណើសុំលុយទេ នោះអាយុជីវិតរបស់គាត់អាចនឹងរងការគំរាមកំហែង។

ភ្លាមៗនោះដែរ ស្ថានីយ៍ប៉ូលិស Gamdevi ក្នុងទីក្រុង Mumbai រដ្ឋធានីនៃរដ្ឋ Maharashtra ភាគខាងត្បូង បានបើកឯកសារមួយដើម្បីស៊ើបអង្កេតឧប្បត្តិហេតុនេះ ដោយផ្អែកលើព័ត៌មានជំនួយពីប្រធានសន្តិសុខនៃក្រុមហ៊ុន Reliance Industry។

យ៉ាងណាមិញ កាលពីថ្ងៃទី ២៧ ខែតុលា ក្រុមហ៊ុននេះបានទទួលអ៊ីមែលទាមទារចំនួនទឹកប្រាក់ស្មើនឹង ២.៥ លានដុល្លារអាមេរិក។ មួយថ្ងៃក្រោយមក សំណើមួយទៀតបានបន្តបង្កើនសំណើនេះ ១០ ដង (២៥ លានដុល្លារ)។ អង្គភាពឧក្រិដ្ឋកម្ម និងឧក្រិដ្ឋកម្មតាមអ៊ីនធឺណិតរបស់ប៉ូលីស Mumbai ឥឡូវនេះបានឈានជើងចូលស៊ើបអង្កេតអត្តសញ្ញាណរបស់បុគ្គលដែលបានបញ្ជូនការគំរាមកំហែងនេះ។

សូមរម្លឹកផងដែរថា ក្នុងឆ្នាំ ២០២២ ប៉ូលិស Mumbai បានចាប់ខ្លួនបុរសម្នាក់នៅក្នុងរដ្ឋ Bihar សម្រាប់ការហៅម្តងហើយម្តងទៀតដើម្បីគំរាមកំហែងមហាសេដ្ឋី Ambani និងគ្រួសាររបស់គាត់។ បុរសនេះក៏បានគំរាមបំផ្ទុះគ្រាប់បែកនៅឯមន្ទីរពេទ្យដែលជាកម្មសិទ្ធិរបស់ក្រុម Reliance ក្នុងទីក្រុងបុមបៃដូចគ្នា៕