ភូមិមួយនៅឥណ្ឌូនេស៊ីជន់លិចដោយទឹកជំនន់ពណ៌ក្រហមដូចឈាម

ភូមិមួយរបស់ប្រទេសឥណ្ឌូនេស៊ីត្រូវបានជន់លិចដោយទឹកពណ៌ក្រហមដូចឈាម បន្ទាប់ពីទឹកជំនន់បានវាយប្រហាររោងចក្រផលិតទឹកថ្នាំក្នុងស្រុក ។

ថ្នាំជ្រលក់ពណ៌ក្រហមត្រូវបានបញ្ចេញនៅតាមដងផ្លូវតំបន់ Jenggot ភាគកណ្តាលខេត្ត Java កាលពីថ្ងៃសៅរ៍ ។ តំបន់នេះស្ថិតនៅភាគខាងត្បូងនៃទីក្រុង Pekalongan ដែលល្បីល្បាញខាងត្បាញ និងវាយនភណ្ឌក្រណាត់ជ្រលក់ ។

អ្នកប្រើប្រាស់បណ្តាញសង្គមរាប់ពាន់នាក់បានចែករំលែករូបភាពនៃពណ៌ទឹកដែលជន់លិចភូមិ ខណៈមន្ត្រីជំនួយក្នុងតំបន់ម្នាក់បានបញ្ជាក់ថា ពណ៌ទឹកនោះគឺពិតជាកើតចេញពីរោងចក្រផលិតទឹកថ្នាំមែន ។

លោក Dimas Arga Yudha បានប្រាប់ទីភ្នាក់ងារសារព័ត៌មាន Reuters ថា “ទឹកជំនន់ពណ៌ក្រហមនោះគឺដោយសារតែថ្នាំជ្រលក់ដែលត្រូវបានរងគ្រោះដោយទឹកជំនន់ ។ វានឹងរលាយបាត់នៅពេលវាលាយជាមួយទឹកភ្លៀងភ្លាមៗ” ។

យោងតាមសារព័ត៌មាន Reuters បានឲ្យដឹងថា កាលពីមុនទឹកទន្លេនៅទីក្រុង Pekalongan បានផ្លាស់ប្តូរពណ៌ ដោយសារថ្នាំជ្រលក់ដែលត្រូវបានប្រើក្នុងការច្នៃម៉ូដ ហើយបានជន់លិចភូមិមួយផ្សេងទៀតពោរពេញដោយពណ៌បៃតងកាលពីខែមុន ។

គួរបញ្ជាក់ថា ឥណ្ឌូនេស៊ីរងការវាយប្រហារដោយទឹកជំនន់ជាញឹកញាប់ ហើយមានមនុស្សយ៉ាងហោចណាស់ ៤៣ នាក់បានស្លាប់ បន្ទាប់ពីព្យុះដែលបានវាយប្រហាររដ្ឋធានីហ្សាការតាកាលពីដើមឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ BBC

ចុចអាន ៖ ក្រោយរួមភេទជាមួយបុរសដូចគ្នា គូស្នេហ៍ឥណ្ឌូនេស៊ីត្រូវវាយជិត ៨០ រំពាត់

ចុចអាន ៖ បណ្ដុំរូបភាពកំសត់ៗក្រុមគ្រួសារជនរងគ្រោះនៃការធ្លាក់យន្តហោះឥណ្ឌូនេស៊ីធ្វើពិធីរំឭកវិញ្ញាណក្ខន្ធនៅសមុទ្រ