ទីបំផុត អាមេរិក ទទួលស្គាល់ថា ក្រុម​ហាម៉ាស ​ពិតជាមានទីបញ្ជាការ​ នៅ​ក្រោម​មន្ទីរពេទ្យ ហ្គាហ្សា មែន

តាមការអះអាងពីសហរដ្ឋ​អាមេរិក, ខ្លួនទទួលបានរបាយការណ៍ចារកម្មដែល​ថា ក្រុម​ហាម៉ាស​ពិតជាមានទីបញ្ជាការ​មួយ ​ស្ថិត​នៅ​ក្រោម​មន្ទីរពេទ្យ Al-Shifa ក្នុង​ទីក្រុង ហ្គាហ្សា មែន។

អ្នកនាំពាក្យសន្តិសុខជាតិ លោក John Kirby និយាយកាលពីថ្ងៃអង្គារទី១៤ខែវិច្ឆិកាថា ក្រុមនេះ បានរក្សាទុកអាវុធនៅទីនោះ ហើយត្រៀមខ្លួនសម្រាប់ការវាយប្រហាររបស់អ៊ីស្រាអែល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាលើកទីមួយហើយ ដែលអាមេរិកបានគាំទ្រដោយឯករាជ្យលើការអះអាងរបស់សម្ព័ន្ធមិត្តជិតស្និទ្ធគឺអ៊ីស្រាអែល ដែលថា ក្រុមហាម៉ាស ប្រើប្រាស់មន្ទីរពេទ្យដើម្បីលាក់មូលដ្ឋានរបស់ខ្លួន ថ្វីបើក្រុមចលនាប្រដាប់អាវុធ បានបដិសេធចំពោះ​រឿង​នេះម្តងហើយម្តងទៀតក៏ដោយ។

ឆ្លើយតបទៅការកត់សម្គាល់របស់សេតវិមាន ក្រុមហាម៉ាសបាននិយាយក្នុងសេចក្តីថ្លែងការណ៍មួយដែលរាយការណ៍ដោយទីភ្នាក់ងារព័ត៌មាន AFP ថា ការទទួលស្គាល់របស់អាមេរិកបែបនេះ នឹងធ្វើឲ្យអ៊ីស្រាអែលបានដៃ ហើយបើកភ្លើងខៀវ ឲ្យមានការសម្លាប់រង្គាលយ៉ាងព្រៃផ្សៃជាបន្តទៀត។

សេចក្តី​ថ្លែងការណ៍​នេះ​​កើត​ឡើង ​ខណៈ​​អ៊ីស្រាអែល ​ប្រឈម​មុខ​នឹង​សម្ពាធទូទាំង​ពិភពលោក​កាន់តែ​ខ្លាំង​ឡើង​ ឲ្យ​ការពារ​ជន​ស៊ីវិល​ដែល​ជាប់​នៅ​ក្នុង​មន្ទីរពេទ្យនោះ។

ប្រធានាធិបតីអាមេរិកលោក ចូ បៃដិន និយាយថា មន្ទីរពេទ្យ Al-Shifa ត្រូវតែការពារពីការប្រយុទ្ធគ្នាដ៏ខ្លាំងក្លានៅជុំវិញបរិវេណនោះឲ្យបាន ហើយនាយករដ្ឋមន្រ្តីអង់គ្លេសលោក Rishi Sunak ក៏និយាយដែរថា អ៊ីស្រាអែល ត្រូវតែធ្វើសកម្មភាពតាមច្បាប់អន្តរជាតិ។

នៅតំបន់ជុំវិញ Al-Shifa ដែលជាមន្ទីរពេទ្យធំបំផុតរបស់ហ្គាហ្សា បានក្លាយជាចំណុចសំខាន់នៃការប្រយុទ្ធគ្នាក្នុងរយៈពេលប៉ុន្មានថ្ងៃថ្មីៗនេះ ខណៈមនុស្សរាប់ពាន់នាក់ ត្រូវបានគេជឿថាកំពុងស្ថិតនៅទីនោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ ទីបំផុត អង្គការសិទ្ធិមនុស្ស ចេញមុខនិយាយរឿង អ៊ីស្រាអែល វាយប្រហារមន្ទីរពេទ្យនៅ ហ្គាហ្សា