ក្រុមហាម៉ាស ថា ការទម្លាក់គ្រាប់បែករបស់ អ៊ីស្រាអែល នៅតំបន់ហ្គាហ្សា សម្លាប់តែជនស៊ីវិលប៉ុណ្ណោះ

មន្ត្រីជាន់ខ្ពស់របស់ក្រុមប្រដាប់អាវុធប៉ាឡេស្ទីនហាម៉ាសបានថ្កោលទោសប្រទេសអ៊ីស្រាអែល ដោយអះអាងថា ជាង ៤០ ភាគរយនៃអ្នកស្លាប់ ដោយសារការវាយប្រហារពីសំណាក់យោធាអ៊ីស្រាអែល គឺជាជនស៊ីវិលមកពីភាគខាងត្បូងនៃតំបន់ហ្គាហ្សាស្ទ្រីប ។

លោក Osama Hamdan បាននិយាយនៅក្នុងសន្និសីទសារព័ត៌មានមួយកាលពីថ្ងៃសៅរ៍ក្នុងទីក្រុង Beirut ថា “ការទម្លាក់គ្រាប់បែករបស់អ៊ីស្រាអែលគឺសុទ្ធតែសម្លាប់ជនស៊ីវិល ទោះបីជាពួកគេបានប្រាប់ឲ្យជម្លៀសទៅភាគខាងត្បូងក៏ដោយ ក្រោមលេស​ស្វែងរក​មជ្ឈមណ្ឌល​បញ្ជា និងមូលដ្ឋាយោធា​របស់​ក្រុម​ហាម៉ាស​ក្រោម​បរិវេណមន្ទីរពេទ្យ Al-Shifa” ។

ទោះយ៉ាងណា លោក Hamdan បានប្រាប់អ្នកសារព័ត៌មានថា គ្មានមជ្ឈមណ្ឌលបញ្ជាការរបស់ក្រុមហាម៉ាស ឬចំណាប់ខ្មាំងត្រូវបានរកឃើញនៅមន្ទីរពេទ្យ Al-Shifa នោះទេ ហើយពួកគេកំពុងប្រព្រឹត្តបទឧក្រិដ្ឋធ្ងន់ធ្ងរ ដោយសារតែការបណ្ដេញអ្នកជំងឺ អ្នករងរបួស និងបុគ្គលិកពេទ្យចេញពីកន្លែងនោះ ។

លោកបានបន្ថែមថា កងកម្លាំងអ៊ីស្រាអែលបានប្រព្រឹត្តបទល្មើសផ្សេងៗនៃច្បាប់អន្តរជាតិ ដូចជាការទម្លាក់គ្រាប់បែកលើមន្ទីរពេទ្យ ជាពិសេសរដ្ឋាភិបាលសហរដ្ឋអាមេរិកក្រោមការដឹកនាំរបស់លោកប្រធានាធិបតី ចូ បៃដិន ក៏ទទួលខុសត្រូវផងដែរ ដោយសារតែការគាំទ្រអ៊ីស្រាអែល ។

ទន្ទឹមនោះ មន្ត្រីរូបនេះក៏បានពណ៌នាអំពីវិបត្តិមនុស្សធម៌នៅតំបន់ហ្គាហ្សាផងដែរ ដោយលើកឡើងថា មានតែ ១ ភាគ ១០ នៃបរិមាណអាហារត្រូវបានដល់ដៃពលរដ្ឋហ្គាហ្សា ។ លោកបានបន្ថែមថា អ៊ីស្រាអែលកំពុងបង្ខំជនស៊ីវិលចេញពីភាគខាងជើងតំបន់ហ្គាហ្សា ដោយសារតែការសម្លាប់រង្គាល ការអត់ឃ្លាន និងការវាយឆ្មក់ទៅលើមន្ទីរពេទ្យ ។

រហូតមកដល់ពេលនេះ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ចាប់តាំងពីក្រុមហាម៉ាសប៉ាឡេស្ទីនបើកការរវាយប្រហារឆ្លងព្រំដែនកាលពីថ្ងៃទី៧ ខែតុលា និងបានចាប់ចំណាប់ខ្មាំងប្រហែល ២៤០ នាក់ ។

យោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ចាប់តាំងពីពេលនោះមក ជនស៊ីវិលលើស ១២,០០០ នាក់ត្រូវបានសម្លាប់ រួមទាំងកុមារ និងស្ត្រីជាង ៨,៣០០ នាក់ ខណៈខាងអ៊ីស្រាអែលវិញមានមនុស្សជិត ១,២០០ នាក់បានបាត់បង់ជីវិត ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សជាង ៣០,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ីស្រាអែល បើកការទម្លាក់គ្រាប់បែកលើសាលារៀននៅតំបន់ហ្គាហ្សាវិញម្ដង សម្លាប់ជន ស៊ីវិល ៨០ នាក់