ជំងឺឆ្កែឆ្កួតមួយប្រភេទកំពុងរីករាលដាលពាសពេញសហរដ្ឋអាមេរិក

ជំងឺផ្លូវដង្ហើមអាថ៍កំបាំងដែលធ្វើឲ្យសត្វឆ្កែឈឺ បាននិងកំពុងរីករាលដាលដល់រដ្ឋជាច្រើនទៀតពាសពេញសហរដ្ឋអាមេរិក និងកំពុងបង្កើនការភ័យខ្លាចចំពោះជំងឺរាតត្បាតមួយនេះ ខណៈពេទ្យសត្វកំពុងព្យាយាមកំណត់អត្តសញ្ញាណរបស់ជំងឺ និងតាមដានប្រភពដើមរបស់វា។

ជំងឺនេះត្រូវបានគេហៅថា Atypical Canine Infectious Respiratory Disease (aCIRD) បានឆ្លងដល់សត្វឆ្កែរាប់រយក្បាលនៅក្នុងរដ្ឋ Oregon ។ ក្រោយមកគេបានរកឃើញករណីដំបូងនៅរដ្ឋកាលីហ្វ័រញ៉ា កាលពីថ្ងៃអង្គារដោយមានសត្វឆ្កែយ៉ាងហោចណាស់ចំនួន ១០ក្បាលបានឈឺដោយសារជំងឺនេះ។

បច្ចុប្បន្នសត្វឆ្កែនៅក្នុងរដ្ឋយ៉ាងហោចណាស់ ៧ ផ្សេងទៀតនៅសហរដ្ឋអាមេរិក ត្រូវបានរាយការណ៍ថាបានរងផលប៉ះពាល់ ហើយក្នុងករណីកម្រជំងឺនេះអាចបណ្តាលឱ្យងាប់។ រោគសញ្ញាទូទៅរួមមាន ក្អក ហៀរសំបោរ និងបាត់បង់ចំណង់អាហារ។ សត្វឆ្កែមួយចំនួនដែលទទួលរងនូវជំងឺរយៈពេលយូរនឹងមានរោគសញ្ញាដូចជាជំងឺរលាកសួត។

វេជ្ជបណ្ឌិត Karl Jandrey សាស្ត្រាចារ្យនៅសាលាពេទ្យសត្វនៃសាកលវិទ្យាល័យ California Davis បានប្រាប់ NBC News ថា “ខ្ញុំមិនអាចទាយទុកជាមុនថាវានឹងទៅដល់ទីណាទេ។ នេះជាជំងឺរាតត្បាតមួយផ្សេងទៀត ប្រសិនបើអ្នកមិនប្រុងប្រយ័ត្ន ប៉ុន្តែវានៅក្រោមការគ្រប់គ្រងបាននៅឡើយទេ” ។

សមាគមពេទ្យសត្វអាមេរិក (AVMA) បានព្រមាន កាលពីថ្ងៃអង្គារថា ករណីនៃជំងឺផ្លូវដង្ហើមឆ្កែមួយនេះកំពុងកើនឡើងនៅទូទាំងសហរដ្ឋអាមេរិក។ ក្រុម AVMA បានផ្តល់អនុសាសន៍ឱ្យមានការប្រុងប្រយ័ត្នរួមមាន រក្សាការចាក់វ៉ាក់សាំងឱ្យសត្វចិញ្ចឹម និងត្រូវដាក់ឆ្កែឈឺនៅដាច់ដោយឡែកពីគេយ៉ាងហោចណាស់ ២៨ ថ្ងៃ៕

ប្រែសម្រួល៖ សន្យា

ប្រភព៖ RT

ចុចអាន៖ ដឹងទេ “វ៉ាក់សាំងឆ្កែឆ្កួត” ប្រសិនជាចាក់មិនគ្រប់ចំនួនតាមការកំណត់ទេ គ្មានអង់ទីគ័រការពារឡើយ!