អ៊ីស្រាអែល ប្តូរយុទ្ធសាស្រ្ត នៅហ្គាហ្សា រីឯនាវាផ្ទុកយន្តហោះអាមេរិក ក៏បកទៅផ្ទះវិញ

អ៊ីស្រាអែល បានប្រកាសពីផែនការផ្លាស់ប្តូរយុទ្ធសាស្ត្រ និងបន្ថយចំនួនកងទ័ព ហើយថែមទាំងដករថក្រោះចេញពីតំបន់ខ្លះនៃជ្រោយហ្គាហ្សាទៀតផង ប៉ុន្តែការប្រយុទ្ធគ្នានិងការទម្លាក់គ្រាប់បែកទ្រង់ទ្រាយធំលើទីតាំងខ្លះ នៅតែមានកម្រិតធ្ងន់ធ្ងរនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្តូរយុទ្ធសាស្រ្តនេះកើតឡើង ចំពេលកងទ័ពជើងទឹកអាមេរិកប្រកាសថា នាវាផ្ទុកយន្តហោះ Gerald R Ford កំពុងវិលត្រលប់ទៅកំពង់ផែរបស់ខ្លួនក្នុងរដ្ឋ Virginia វិញ ក្រោយការដាក់ពង្រាយទៅកាន់សមុទ្រមេឌីទែរ៉ាណេភាគខាងកើត ពេលភាពតានតឹងហក់ឡើងខ្ពស់។

តាមការបញ្ជាក់ពីអ៊ីស្រាអែល សង្គ្រាមជាមួយក្រុមសកម្មប្រយុទ្ធប៉ាឡេស្ទីនហាម៉ាស អាចអូសបន្លាយពេលរាប់ខែទៀត ខណៈគិតត្រឹមពេលនេះ ជម្លោះបានសម្លាប់មនុស្សរាប់ម៉ឺននាក់ និងបណ្តាលឲ្យមនុស្ស២.៣លាននាក់ ធ្លាក់ចូលទៅក្នុងគ្រោះមហន្តរាយមនុស្សធម៌រួចទៅហើយ។

យ៉ាងណា ក្រោយចូលឆ្នាំថ្មី អ៊ីស្រាអែល ស្រាប់តែបង្ហាញពីដំណាក់កាលថ្មីក្នុងការវាយលុករបស់ខ្លួន ដោយមន្ត្រីម្នាក់ប្រកាសថា យោធានឹងដកកម្លាំងចេញពីតំបន់ហ្គាហ្សាក្នុងខែនេះ ហើយប្តូរទៅប្រតិបត្តិការបោសសម្អាតដំណាក់កាលមួយទៀតនៅភាគខាងជើង ប៉ាឡេស្ទីន។

មន្ត្រីអ៊ីស្រាអែលនិយាយថា ការកាត់បន្ថយចំនួនទ័ពនេះ នឹងអនុញ្ញាតឲ្យទាហានបម្រុងមួយចំនួន វិលទៅប្រើជីវិតបែបសាមញ្ញវិញ ជួយពង្រឹងសេដ្ឋកិច្ចអ៊ីស្រាអែលដែលរងទុក្ខដោយសារសង្រ្គាម និងការរៀបចំអង្គភាពក្នុងករណីមានជម្លោះកាន់តែធំនៅភាគខាងជើង ជាមួយក្រុមហេសបូឡារបស់ប្រទេសលីបង់ ដែលមានការគាំទ្រពីអ៊ីរ៉ង់។

ការបាញ់កាំភ្លើងធំរវាងក្រុមហេសបូឡានិងអ៊ីស្រាអែល បានរង្គើព្រំដែន ចាប់តាំងជម្លោះហ្គាហ្សាផ្ទុះឡើង។ យ៉ាងណា មន្ត្រី​អ៊ីស្រាអែល​អះអាង​ថា ស្ថានភាព​នៅ​តាម​ព្រំដែន​លីបង់ នឹង​មិន​ត្រូវ​​អនុញ្ញាត​ឲ្យ​បន្ត​ទៀត​ឡើយ។​ រយៈ​ពេល​ប្រាំមួយ​ខែ​ខាង​មុខ​ គឺជា​ពេល​វេលា​ដ៏​សំខាន់។

សូមបញ្ជាក់ជាថ្មី សង្គ្រាមនៅតំបន់ហ្គាហ្សា ត្រូវបានបង្កឡើងដោយការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាសលើទីប្រជុំជនអ៊ីស្រាអែលកាលពីថ្ងៃទី៧ខែតុលា ដែលអ៊ីស្រាអែលនិយាយថា បានសម្លាប់មនុស្ស១២០០នាក់។

ដោយឡែក អាជ្ញាធរសុខាភិបាលប៉ាឡេស្ទីននៅតំបន់ហ្គាហ្សាដែលគ្រប់គ្រងដោយក្រុមហាម៉ាសក៏និយាយដែរថា ការវាយលុករបស់អ៊ីស្រាអែលនៅទីនោះ បានសម្លាប់មនុស្ស ២១៩៧៨នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ នាវាចម្បាំង អាមេរិក បាញ់ទម្លាក់យន្តហោះគ្មានមនុស្សបើក និងមីស៊ីល របស់ក្រុមហ៊ូធីនៅសមុទ្រក្រហម