អ្នកនាំពាក្យក្រសួងកិច្ចការបរទេសឥណ្ឌា បដិសេធរឿងនាំអាវុធទៅកាន់អ៊ុយក្រែន

ស្របពេលដែលកាលពីពេលថ្មីៗនេះ បណ្ដាញសង្គម ការពារជាតិគាំទ្រអ៊ុយក្រែនបានផ្សាយថា “កាំភ្លើងធំដែលផលិតដោយឥណ្ឌាត្រូវបានប្រើប្រាស់ដោយកងកម្លាំងអ៊ុយក្រែនក្នុងជម្លោះដែលកំពុងបន្តប្រឆាំងនឹងរុស្ស៊ី” ស្រាប់តែក្រសួងកិច្ចការបរទេសឥណ្ឌា (MEA) បានបកស្រាយដើម្បីកុំឱ្យមានការយល់ច្រឡំថា ទីក្រុងញូវដែលី មិនបាននាំចេញគ្រាប់កាំភ្លើងធំណាមួយទៅកាន់ ទីក្រុងគៀវទេ ខណៈដែលខ្លួនក៏បានប្រតិកម្មទៅនឹងរបាយការណ៍ប្រព័ន្ធផ្សព្វផ្សាយខាងលើនេះដែរ ។

លោក Randhir Jaiswal អ្នកនាំពាក្យក្រសួងកិច្ចការបរទេសឥណ្ឌា (MEA) បាននិយាយទៅកាន់អ្នកកាសែតយ៉ាងដូចច្នេះថា “យើងបានឃើញរបាយការណ៍ដែលចុះផ្សាយថា កាំភ្លើងធំដែលផលិតនៅឥណ្ឌា កំពុងត្រូវបានប្រើប្រាស់ដោយទាហ៊ានអ៊ុយក្រែនក្នុងសង្គ្រាម អ៊ុយក្រែន-រុស្ស៊ី ប៉ុន្តែយើងហ៊ានអះអាងថា យើងមិនដែលបានបញ្ជូនវាទៅអ៊ុយក្រែនឡើយ” ។ ជុំវិញទៅនឹងរឿងនេះដែរអ្នកជំនាញកិច្ចការយុទ្ធសាស្ត្ររបស់ឥណ្ឌាបានសម្តែងការព្រួយបារម្ភថា លោកខាងលិចកំពុងព្យាយាមបង្អាក់ទំនាក់ទំនងឥណ្ឌា-រុស្ស៊ី ដែលកំពុងកើនឡើង តាមរយ:ការផ្សាយព័ត៌មានបំភាន់ ។

យ៉ាងណាមិញ តាមសេចក្តីរាយការណ៍ គេក៏ឃើញសំបកគ្រាប់របស់ទាហ៊ានអ៊ុយក្រែន ពិតជាមានស្លាកសញ្ញារោងចក្រ Nalanda Ordnance ក្នុងរដ្ឋ Bihar ប្រទេសឥណ្ឌា ប្រាកដមែន។ ប៉ុន្តែភ័ស្ដុតាងនេះ គេប៉ាន់ស្មានថា គ្រាប់កាំភ្លើងធំអាចត្រូវបានគេដឹកជញ្ជូនទៅកាន់ប្រទេសអ៊ុយក្រែនពីបណ្តាប្រទេសសហភាពអឺរ៉ុប (EU) ដូចជាប៉ូឡូញ ឬស្លូវេនី បន្ទាប់ពីបានទិញពីប្រទេសឥណ្ឌា។

សូមបញ្ជាក់ថា របាយការណ៍ដែលឥណ្ឌាអះអាងថា ជារបាយការណ៍បំភាន់ខាងលើនេះ បានកើតឡើងភ្លាមៗបន្ទាប់ពីរដ្ឋមន្ត្រីការបរទេសឥណ្ឌា (EAM) លោក S Jaishankar បានបញ្ចប់ដំណើរទស្សនកិច្ចផ្លូវការរយៈពេល៥ថ្ងៃរបស់គាត់ ទៅកាន់ទីក្រុងម៉ូស្គូកាលពីខែមុន៕

ប្រែសម្រួលដោយ÷ កុសល

ប្រភព÷ sputniknews