យន្តហោះក្រុមហ៊ុនអាកាសចរណ៍ Jetstar មួយគ្រឿង បុកគ្នាជាមួយរថយន្តសន្តិសុខអាកាសយាដ្ឋាន

នាព្រឹកថ្ងៃច័ន្ទ ខែមករា នេះ ជើងហោះហើរ របស់ក្រុមហ៊ុនអាកាសចរណ៍ Jetstar មួយចំនួនបានលុបចោល បន្ទាប់ពីមានករណីយន្តហោះ របស់ Jetstar មួយគ្រឿងបានបុកជាមួយរថយន្តប្រភេទ Ute នៅអាកាសយានដ្ឋាន Sydney ។

ប្រភពព័ត៌មានពីអាកាសយានដ្ឋាន Sydney បាននិយាយថា រថយន្តប្រភេទ​ Ute មួយគ្រឿងបើកបរដោយសន្តិសុខរបស់អាកាសយានដ្ឋាន បានបើកទៅបុកនឹងយន្តហោះរបស់ ក្រុមហ៊ុនអាកាសចរណ៍ Jetstar ប្រភេទ Airbus A320 មួយគ្រឿង ដែលកំពុងចតលើផ្លួវ។ ហើយករណីនេះត្បិតតែមិនបង្កឱ្យមាននរណាម្នាក់រងរបួសធ្ងន់ ប៉ុន្តែវាបានរំខានដល់អ្នកដំណើរជាច្រើន ដែលតម្រូវឱ្យប្ដូរជើងហោះហើរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីក្រុមហ៊ុន អាកាសចរណ៍ Jetstar បានឱ្យដឹងដែរថា យន្តហោះ Airbus A320 ជើងហោះហើរ JQ760 នឹងត្រូវហោះទៅកាន់ ទីក្រុង Adelaide នៅម៉ោង ៦៖៤០ ព្រឹក ប៉ុន្តែវាបានជួបឧបទ្ទវហេតុខាងលើនេះ នៅវេលាម៉ោង ៥ ព្រឹក ទើបបណ្ដាលឱ្យមានការពន្យាពេលជើងហោះហើរទូទាំងស្ថានីយ Jetstar តែម្ដង ។

ប្រភពដដែលបានឱ្យដឹងទៀតថា តាមការប៉ាន់ស្មាន គ្រាន់តែជួបឧបទ្ទវហេតុប៉ុននេះ ក្រុមហ៊ុនអាចនឹងខាតបង់ទឹកប្រាក់ប្រហែលជាងកន្លះលានដុល្លារ ៕

ប្រែសម្រួលដោយ៖ ប៉ោ កុសល
ប្រភព៖ 9news