យន្តហោះយោធា មីយ៉ាន់ម៉ា ទៅដឹកទាហានជិត ៣០០ នាក់ដែលភ័យរត់ចូល ឥណ្ឌា ជួបហេតុការណ៍បើកធ្លាក់ផ្លូវ

មនុស្ស ១២ នាក់បានរងរបួសនៅក្នុងហេតុការណ៍យន្តហោះយោធាមីយ៉ាន់ម៉ារត់ធ្លាក់ផ្លូវ អំឡុងពេលចុះចតទៅដឹកទាហានរបស់ខ្លួនដែលភ័យរត់ភៀសខ្លួនទៅកាន់ប្រទេសឥណ្ឌា ក្រោយការបាញ់បោះរបស់ក្រុមបះបោរប្រដាប់អាវុធជនជាតិភាគតិចដែលកំពុងប្រយុទ្ធតតាំងជាមួយនឹងរដ្ឋាភិបាលយោធា ។ នេះបើយោងតាមការចេញផ្សាយដោយសារព័ត៌មានមីយ៉ាន់ម៉ា The Irrawaddy នៅថ្ងៃទី២៤ ខែមករានេះ ។

មន្ត្រីអាជ្ញាធរអាកាសយានដ្ឋានឥណ្ឌា (AAI) បានប្រាប់សារព័ត៌មាន AFP ថា យន្ត​ហោះ Shaanxi Y-8 ផលិត​នៅ​ប្រទេស​ចិន បាន​រអិល​ធ្លាក់​ពី​លើ​ផ្លូវរត់ភ្លាមៗកាលពីថ្ងៃអង្គារ​នៅ​ឯអាកាសយានដ្ឋាន Lengpui ជា​អាកាសយានដ្ឋាន​ដ៏សំខាន់មួយ​នៃ​រដ្ឋ Mizoram ភាគឦសានប្រទេស​ឥណ្ឌា ខណៈជើងហោះហើរនេះគឺទៅដឹកទាហានប្រមាណ ៩២ នាក់ក្នុងមួយជើង ។

មន្ត្រីដែលបានសុំមិនបញ្ចេញឈ្មោះបានបន្ថែមទៀតថា យន្តហោះដែលនឹងត្រូវដឹកទាហានមីយ៉ាន់ម៉ាសរុបចំនួន ២៧៦ នាក់ដែលភ័យរត់ចេញពីតំបន់ព្រំដែនមីយ៉ាន់ម៉ាឆ្លងចូលប្រទេសឥណ្ឌាកាលពីសប្តាហ៍មុន ក្រោយការបាញ់បោះរបស់ក្រុមឧទ្ទាមទ័ពព្រៃ គឺមានបញ្ហាផ្នែកម៉ាស៊ីនភ្លាមៗ អំឡុងពេលចុះចត ហើយបានរត់ធ្លាក់ផ្លូវបាក់តួយន្តហោះស្ទើរតែដាច់ជាពីរ បណ្ដាលឲ្យមនុស្ស ១២ នាក់រងរបួស ខណៈ ៤ នាក់រងរបួសធ្ងន់ធ្ងរ ។

ក្នុងរយៈពេល ២ ខែចុងក្រោយនេះ ទាហានមីយ៉ាន់ម៉ាជិត ៧០០ នាក់បានរត់ឆ្លងចូលទៅភាគឦសានប្រទេសឥណ្ឌា បន្ទាប់ពីក្រុមប្រឆាំងរដ្ឋាភិបាលយោធានៅក្នុងប្រទេសមីយ៉ាន់ម៉ា បានប្រកាសវាយដណ្ដើមកាន់កាប់ទីក្រុង Paletwa និងបន្ទាយទ័ពចំនួន ៦ ទៀតនៅតាមបណ្ដោយព្រំដែនជាមួយប្រទេសឥណ្ឌាកាលពីពាក់កណ្ដាលខែមករា ឆ្នាំ២០២៤ កន្លងទៅ ។

ទន្ទឹមនោះ ចាប់តាំងពីផ្ទុះការបាញ់បោះដាក់គ្នារវាងកងទ័ពអារ៉ាកាន់ (AA) ទៅលើកងកម្លាំងរក្សាសន្តិសុខរបស់រដ្ឋាភិបាលយោធាមីយ៉ាន់ម៉ាកាលពីខែវិច្ឆិកា ឆ្នាំ២០២៣ មក តំបន់មួយចំនួនរបស់មីយ៉ាន់ម៉ាដែលនៅជិតព្រំដែនឥណ្ឌា ក៏ផ្ទុះការប៉ះទង្គិចគ្នា ក៏ដូចជាបណ្ដាលឲ្យប៉ះពាល់ និងខូចខាតហេដ្ឋារចនាសម្ព័ន្ធមួយចំនួនធំផងដែរ ។

គួរបញ្ជាក់ថា យោធាមីយ៉ាន់ម៉ាដែលបានដណ្ដើមអំណាចនៅក្នុងរដ្ឋប្រហារឆ្នាំ ២០២១ កំពុងបាត់បង់ការគ្រប់គ្រងទីក្រុង និងទីស្នាក់ការយោធាជាច្រើននៅជុំវិញប្រទេស ខណៈសមាជិកជាច្រើននាក់របស់កងកម្លាំងសន្តិសុខមីយ៉ាន់ម៉ា បានទម្លាក់អាវុធសុំចុះចាញ់ ក៏ដូចជាត្រូវបានចាប់ខ្លួនផងដែរក្នុងការប្រយុទ្ធគ្នាតាមតំបន់ព្រំដែនជាមួយក្រុមកងកម្លាំងចម្រុះប្រឆាំងរដ្ឋាភិបាលយោធា ៕

ដោយ ៖ សុខ ជីវ័ន្ត

ចុចអាន ៖ ទ័ព មីយ៉ាន់ម៉ា ជិត ៣០០ នាក់ភ័យរត់ឆ្លងដែនចូល ឥណ្ឌា ក្រោយការបាញ់​បោះរបស់ក្រុមឧទ្ទាមប្រដាប់អាវុធ