ទេសចរ ចិន នឹងហោះទៅលេង ថៃ ខណៈពលរដ្ឋ កូរ៉េខាងត្បូង ចុះចាយលុយ​នៅ វៀតណាម ថ្ងៃចូលឆ្នាំចិន

នៅសល់តែជាង ១ សប្ដាហ៍ទៀតប៉ុណ្ណោះ ពិធីបុណ្យចូលឆ្នាំថ្មីប្រពៃណី ចិន-វៀតណាម ឆ្នាំ ២០២៤ នឹងឈានជើងចូលមកដល់ ខណៈប្រទេសថៃ និងវៀតណាមក៏បានដាក់មុខព្រួញ ក៏ដូចជាឆ្លៀតឱកាសទាក់ទាញភ្ញៀវទេសចរនៅក្នុងពិធីបុណ្យមួយនេះផងដែរ ។ នេះបើយោងតាមការចេញផ្សាយដោយសារព័ត៌មាន VN Express កាលពីសប្ដាហ៍មុន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យកក់សណ្ឋាគារពីវេទិកាធ្វើដំណើរតាមអនឡាញ Agoda បានបង្ហាញថា ប្រជាជនកូរ៉េខាងត្បូងកំពុងនាំមុខគេក្នុងបញ្ជីអ្នកទេសចរដែលនឹងហោះទៅលេងកម្សាន្តនៅប្រទេសវៀតណាម ក្នុងអំឡុងពេលថ្ងៃឈប់សម្រាកបុណ្យចូលឆ្នាំថ្មីនាខែក្រោយនេះ ។

ក្នុងទិន្នន័យដែលធ្វើឡើងចន្លោះថ្ងៃទី១ ដល់ថ្ងៃទី១៥ ខែមករាបានឲ្យដឹងទៀតថា តាមពីក្រោយដោយអ្នកទេសចរកូរ៉េខាងត្បូង, វៀតណាមក៏នឹងអាចស្រូបទាញភ្ញៀវបរទេសមកពីចិន សិង្ហបុរី ហុងកុង និងជប៉ុនផងដែរសម្រាប់ការហោះចូលមកលេងកម្សាន្តក្នុងពិធីបុណ្យចូលឆ្នាំថ្មីនៅថ្ងៃទី៩ ឬថ្ងៃទី១០ ខែកុម្ភៈ ហើយភ្ញៀវក្រាក់ៗទាំងនោះនឹងបន្តស្នាក់នៅយ៉ាងតិច ២ យប់ ។

ទីក្រុងហូជីមិញ ដែលល្បីល្បាញខាងតុបតែងផ្កាតាមដងផ្លូវ និងការសម្ដែងរបាំនាគ គឺជាគោលដៅកំពូងសម្រាប់ពិធីបុណ្យចូលឆ្នាំថ្មីប្រពៃណី ចិន-វៀតណាម និងតាមពីក្រោយដោយទីក្រុង Da Nang, Nha Trang, Hanoi និង Phu Quoc ។

ទន្ទឹមនោះ វិស័យ​ទេសចរណ៍​ក្នុង​ស្រុក​ក៏​ស្ទុះងើបឡើងវិញផងដែរ ​ដោយ​មានប្រជាពលរដ្ឋ​សម្រុក​ទៅដើរលេង​កម្សាន្ត​នៅ​កន្លែង​ទេសចរណ៍ផ្សេងៗគ្នា ខណៈឆ្នាំនេះទីក្រុង Da Lat គឺជាផ្ទាំងស៊ីបទេសចរណ៍ពេញនិយមបំផុតសម្រាប់ភ្ញៀវទេសចរវៀតណាម បន្ទាប់មកគឺ Nha Trang, Da Nang, Ho Chi Minh និង Phan Thiet ។

ចំណែកប្រទេសថៃរំពឹងនឹងអូសទាញភ្ញៀវទេសចរបរទេសជាង ១ លាននាក់ក្នុងថ្ងៃឈប់សម្រាកបុណ្យចូលឆ្នាំថ្មីប្រពៃណី ចិន-វៀតណាម ចាប់ពីថ្ងៃទី៨ ដល់ថ្ងៃទី១៦ ខែកុម្ភៈ ដោយក្នុងនោះជិត ២០ ម៉ឺននាក់អាចមកពីចិនដីគោក ហុងកុង និងតៃវ៉ាន់ ហើយទេសចរទាំងនោះនឹងចាយយ៉ាងក្រាស់ក្រែលលើថ្លៃធ្វើដំណើរជាង ១,៦០០ ដុល្លារក្នុងម្នាក់ ។

ចំពោះក្ដីរំពឹងដែលថៃដាក់ចេញមកនេះ គឺដោយសារតែបរិយាកាសទេសចរណ៍ លក្ខខណ្ឌអំណោយផលនៃការធ្វើដំណើរ គោលនយោបាយលើកលែងទិដ្ឋាការរបស់ប្រទេសថៃ និងការបង្កើនលទ្ធភាពហោះហើរជាដើម ខណៈការចាយលុយភាគច្រើនទំនងជានឹងស្ថិតក្នុងប្លុកនៅទីក្រុងបាងកក ជាកន្លែងដែលអ្នកទេសចរចិន ជាពិសេសមកពីហុងកុង និងតៃវ៉ាន់ ចូលចិត្តស្នាក់នៅសណ្ឋាគារលំដាប់អភិជន ។

គួរបញ្ជាក់ថា កាលពីឆ្នាំមុនប្រទេសថៃបានឈានដល់គោលដៅទេសចរណ៍ចំនួន ២៨ លាននាក់ ស្របពេលមុខព្រួញសម្រាប់ឆ្នាំ ២០២៤ នេះវិញ រដ្ឋាភិបាលបានកំណត់ទិសដៅការមកលេងកម្សាន្តរបស់អ្នកទេសចរជាង ៣៤ លាននាក់ ខណៈវៀតណាមកើបបានភ្ញៀវទេសចរបរទេសចំនួន ១២.៦ លាននាក់កាលពីឆ្នាំមុន ឬប្រហែល ៧០ ភាគរយនៃកម្រិត មុនរោគរាតត្បាតកូវីដ ១៩ ហើយនៅឆ្នាំនេះ វៀតណាមដាក់​គោលដៅ​ ១៨ ​លាននាក់ ​៕

ដោយ ៖ សុខ ជីវ័ន្ត

ចុចអាន ៖ ស្ថានភាពកាន់តែវឹកវរ លេចមុខក្រុមទ័ពព្រៃមួយទៀតចេញធ្វើសង្គ្រាមបះ បោរជាមួយរដ្ឋាភិបាលយោធា មីយ៉ាន់ម៉ា