នាយករដ្ឋមន្ត្រី ថៃ កើតគ្រុនផ្ដាសាយប្រភេទ A ត្រូវលុបចោលកិច្ចប្រជុំទាំង​អស់

នាយករដ្ឋមន្ត្រីថៃលោក សេដ្ឋា ថាវីស៊ីន នៅថ្ងៃពុធនេះបានលុបចោលគម្រោងជួបជុំទទួលទានអាហារពេលល្ងាចជាមួយមេកងកម្លាំងប្រដាប់អាវុធ ក៏ដូចជាប្រគល់ភារកិច្ចមួយចំនួនទៅឲ្យលោកឧបនាយករដ្ឋមន្ត្រី សុំស័ក្កិ ទេពស៊ូទីន ជាអ្នកកាន់ជំនួស បន្ទាប់ពីលោកកើតជំងឺគ្រុនផ្ដាសាយប្រភេទ A ឬហៅថា H1N1 ។

បើយោងតាមការចុះផ្សាយដោយសារព័ត៌មានថៃ The Nation នៅថ្ងៃទី៣១ ខែមករានេះបានឲ្យដឹងថា មុនកើតគ្រុនផ្ដាសាយកម្រិត A, លោក សេដ្ឋា មានអាការៈមិនសូវស្រួលខ្លួន ល្ហិតល្ហៃ ហើយក៏អញ្ជើញទៅឲ្យគ្រូពេទ្យពិនិត្យ និងធ្វើតេស្តឈាម ហើយជាលទ្ធផលលោកនាយករដ្ឋមន្ត្រីបានកើតជំងឺ H1N1 ខណៈការសម្រេចចិត្តផ្ទេរភារកិច្ចគឺដោយសារតែលោកខ្លាចចម្លងទៅអ្នកធ្វើការជិតខ្លួន ។

គ្រុនផ្តាសាយកម្រិត A ឬ H1N1 ត្រូវបានគេរកឃើញជាលើកដំបូងនៅក្នុងប្រទេសម៉ិកស៊ិក និងសហរដ្ឋអាមេរិកកាលពីឆ្នាំ ២០០៩ ដែលវាស្រដៀងគ្នាទៅនឹងជំងឺផ្ដាសាយបក្សី H5N1 មុនពេលរីករាលដាលយ៉ាងឆាប់រហ័សមិនធ្លាប់មាននៅពាសពេញពិភពលោក ខណៈអង្គការសុខភាពពិភពលោក (WHO) បានចាត់ទុកជំងឺនេះជាមេរោគដែលផ្លាស់ប្ដូរតាមរដូវ ប៉ុន្តែសាបរលាបទៅវិញនៅក្នុងខែសីហា ឆ្នាំ២០១០ ។

មនុស្សភាគច្រើនដែលកើតជំងឺគ្រុនផ្ដាសាយកម្រិត A ឬ H1N1 មានរោគសញ្ញាដូចជា គ្រុនក្ដៅលើសពី ៣៨ អង្សាសេ ឈឺក្បាល ក្អក ហៀរសំបោរ កណ្ដាស់ ឈឺសាច់ដុំ និងស្រៀវស្រាញក្នុងខ្លួន ខណៈរបៀបឆ្លងវិញជំងឺនេះឆ្លងពីមនុស្សម្នាក់ទៅមនុស្សម្នាក់តាមរយៈទំនាក់ទំនងជិតស្និទ ក្អក កណ្ដាស់ ការប៉ះពាល់ផ្ទៃណាដែលមានមេរោគផ្ដាសាយ ហេតុនេះហើយទើបតម្រូវឲ្យអ្នកជំងឺពាក់ម៉ាស និងលាងដៃជាមួយសាប៊ូឲ្យបានញឹកញាប់ ។

ចំណែកការព្យាបាល អ្នកជំងឺត្រូវប្រើថ្នាំបញ្ចុះកម្ដៅ ទទួលទានទឹកឲ្យបានច្រើន ទទួលទានអាហារបំប៉នឲ្យមានកម្លាំង គេងឲ្យបានលក់ស្កប់ស្កល់ បើអ្នកជំងឺជាអ្នកចូលចិត្តហាត់កីឡាគួរបន្ថយការហាត់សិន ប៉ុន្តែប្រសិនបើក្នុងរយៈពេល ៣ ថ្ងៃហើយ ស្ថានភាពជំងឺនៅតែមិនស្រាកស្រាន្តទេនោះ អ្នកជំងឺគួរទៅជួបគ្រូពេទ្យដើម្បីធ្វើរោគវិនិច្ឆ័យ ៕

ដោយ ៖ សុខ ជីវ័ន្ត

ចុចអាន ៖ ទេសចរ ចិន នឹងហោះទៅលេង ថៃ ខណៈពលរដ្ឋ កូរ៉េខាងត្បូង ចុះចាយលុយ នៅ វៀតណាម ថ្ងៃចូលឆ្នាំចិន