ថៃ រកឃើញ អ្នកចូលចិត្តញ៉ាំម៉ូកៈថៈ កើតជំងឺរ៉ាំរ៉ៃ ៣មុខ

តាមការចេញផ្សាយរបស់ The Nation នៅថ្ងៃព្រហស្បតិ៍ទី១ខែកុម្ភៈ, ក្រសួងសុខាភិបាលថៃ បានព្រមានពលរដ្ឋខ្លួន ឲ្យកាត់បន្ថយការញ៉ាំម៉ូកៈថៈ បន្ទាប់ពីរកឃើញថា អ្នកចូលចិត្តញ៉ាំអាហារបែបនេះ មានហានិភ័យចំពោះសុខភាពដូចជាកើតជំងឺទឹកនោមផ្អែម លើសឈាម និងបេះដូងរ៉ាំរ៉ៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានគាំទ្រសេវាសុខភាព បានធ្វើការស្ទង់មតិប្រជាជនថៃចំនួន ២៦៦៨៩នាក់ ចន្លោះថ្ងៃទី៤ដល់២២ខែធ្នូឆ្នាំ២០២៣ ដោយរកឃើញថា ៣២,១% ក្នុងចំណោមនោះគឺជាអ្នកញ៉ាំម៉ូកៈថៈញឹកញាប់។

លទ្ធផលនៃការស្ទង់មតិក៏បង្ហាញដែរថា អ្នកចូលចិត្តម៉ូកៈថៈ មានទម្លាប់បរិភោគមិនល្អ ដែលឈានទៅកើតជំងឺរ៉ាំរ៉ៃ ដូចជាទឹកនោមផ្អែម លើសឈាម និងសរសៃឈាមបេះដូង ព្រោះពួកគេចូលចិត្តញ៉ាំសាច់ដែលមិនឆ្អិនល្អ សម្បូរជាតិខ្លាញ់ និងប្រើចង្កឹះតែមួយគូពេលទទួលទាន។

ស្របពេលជាមួយគ្នានោះ ក្រសួងបានណែនាំឲ្យ ពលរដ្ឋកាត់បន្ថយការញ៉ាំម៉ូកៈថៈ ឬបើអាចចៀសបានកាន់តែល្អ។ លើសពីនេះ ក្រសួងក៏ជំរុញឲ្យញ៉ាំបន្លែឲ្យបានច្រើន និងញ៉ាំសាច់តិចជាងមុនផងដែរ ហើយងាកមកផឹកទឹកជំនួសឲ្យភេសជ្ជៈវិញ ប្រើចង្កឹះមួយគូសម្រាប់ចាប់សាច់យកទៅអាំងនិងមួយគូសម្រាប់ចាប់សាច់អាំងឆ្អិនយកមកញ៉ាំ ហើយត្រូវញ៉ាំតែសាច់ណាដែលឆ្អិនល្អបានហើយ។

ទោះបីជាយ៉ាងណាក៏ដោយ ក្រសួងមិនហាមឃាត់ការញ៉ាំម៉ូកៈថៈទាំងស្រុងទេ ប៉ុន្តែយល់ល្អ មួយខែញ៉ាំតែ២ដងបានហើយ រួចត្រូវហាត់ប្រាណឲ្យទៀងទាត់ផង៕

អត្ថបទ៖ សុខ សុវណ្ណ

ចុចអាន៖ ពលរដ្ឋជាង២០នាក់ពុលអាហារនៅអាហារដ្ឋានប៊ូហ្វេ ស្រីខួច ក្រុងសៀមរាប